Kulanka uu maanta xafiiskiisa kula yeeshay Wasiirka Warfaafinta, Hidaha iyo Dalxiiska Xukuumadda Soomaaliya Mudane Maxamed Cabdi Xayir (Maareeye) iyo qaar kamid ah maamuliyaasha Warbaahinta Madax banaan ayaa waxaa goob joogka ahaa, Wasiir ku xigeenka, Wasiiru dowlaha Wasaaradda, Agaasimaha guud ee Wasaaradda Warfaafinta iyo qaar kamid ah Agaasime Waaxeedyada Wasaaradda ayaa waxaa looga hadlaayay sidii wada shaqeyn buuxda u dhex mari laheyd Madaxda Wasaaradda Warfaafinta iyo dhamaan Warbaahinta dalka ka howlgasha.
Kulanka ayaa waxaa sidoo kale ka qeybgalay Xoghayaha guud ee ururka Saxafiyiinta Qaranka ee NUSOJ Maxamed Ibraahim (Pakistan) waxaana intii kulanka uu socday la isku dhaafsaday fikiro u aadan sida ugu wanaagsan oo ay u wada shaqeyn lahaayeen Warbaahinta madax banaan iyo Madaxda cusub ee Wasaaradda Warfaafinta Soomaaliya.
Dhamaan mas’uuliyiintii kulanka ka hadashay ayaa tilmaamay in ay muhiim tahay in wada shaqeyn joogto ah ay dhex marto maamuliyaasha Warbaahinta Madax banaan iyo Wasaaradda Warfaafinta Soomaaliya.
Wasiirka Wasaaradda Warfaafinta, Hidaha iyo Dalxiiska Mudane Maxamed Cabdi Xayir (Maareeye) ayaa kulanka ka sheegay in mas’uuliyiinta Wasaaradda Warfaafinta oo uu isaga ugu horeeyo ay ka go’an tahay in uu si dhow ula shaqeeyo dhamaan warbaahinta dalka ka howlgasha maadaama mas’uul ka yahay dhamaan warbaahinta dalka ka dhaqeysa.
Sawir Qaade: Qadar Cali Nuur
