Wafdi ay hogaamineyso Wasiirka Waxbarashada iyo Tacliinta sare ee Xukuumadda Federaalka Soomaaliya oo gaartay magaalada Gaalkacyo ee xarunta gobolka Mudug ayaa kulamo la qaadatay mas’uuliyiinta Maamulada Galmudug iyo Puntland.
Marwo Qadro Bashiir Cali Wasiirka Waxbarashada ee Soomaaliya oo uu wehliyo Guddoomiyaha Jaamacadda Ummadda Soomaaliyeed ayaa waxaa Gaalkacyo ku soo dhaweeyay mas’uuliyiin ka tirsan labada Maamul, iyadoo socdaalkeeda uu la xiriiro sidii ay ugu kuurgali lahayd xaaladaha waxbarasho ee ka jirta magaalada Gaalkacyo ee xarunta Gobolka Mudug.
Marwo Qadro ayaa kulamo la qaadatay mas’uuliyiinta labada Maamul ee Puntland iyo Galmudug oo ay kala hadashay sidii loo horumarin lahaa waxbarashada.
“Aad ayaan u mahadsantihiin sida diiran ee aad ii soo dhaweyseen, socdaalkeeyga waxa uu ku saabsanyahay in aan qiimeyn ku sameyno xaaladaha waxbarasho ee gobolka iyo in aan isbarabo Mas’uuliyiinta iyo bahda waxbarashada” ayay tiri Wasiirka Waxbarashada Soomaaliya.
