Shirka Golaha wasiirrada ee Todobaadlaha ah, waxayaabaha diiradda lagu saaray waxaa ka mid ah arrimaha Ammaanka, dardargelinta Sharuucda muhiimdka u ah Hiigsiga Soomaaliya xoojinta dhismaha ciidammada Qaranka iyo Arrimo kale.
Shirka Golaha wasiirrada ayaa warbixinnada ammaanka dalka looga dhageystay wasiirrada Gaashaandhigga iyo Amniga Gudaha, kuwaas oo soo gudbiyey howlgallada dalka ka socda iyo qorshaha xasilinta magaalooyinka dalka Soomaaliya.
Afhayeenka Xukuumadda Federaalka Soomaaliya Ridwaan Xaaji Cabdiweli, ayaa warbaahinta u sheegay in Ra’iisul wasaaraha Somaaliya, Mudane Cumar C/rashiid Cali uu magcaabay guddiga isku dhafka ciidammada Qaranka Soomaaliya, guddigaas oo ka shaqeyn doona diyaarinta ciidammo hananka kara amniga iyo Difaaca Soomaaliya.
Dhanka kale Ra’iisul wasaaraha Soomaaliya, ayaa magacaabay guddiga dardargelinta shuruucda dalka, kuwaas oo isugu jira kuwa diyaarsan iyo kuwa hadda la soo saari doona, sida uu sharraxay Afhayeenka Xumuumadda Ridwaan Xaaji Cabdiweli.
Golaha wasiirrada Soomaaliya ayaa dood dheer ka yeeshay arrimaha waxbarashada dalka, iyadoo lagu guuleystay middeynta Shahaadooyinka waxbarasho ee dalka iyo qaadis Imtixaannaada Soomaaliya.
Golaha wasiirrada Soomaaliya ayaa soo dhoweeyey howlgallada ciidammada ammaanka dowladda Soomaaliya ay ka wadaan Caasimadda, iyadoo ciidammadu ay gacanta ku dhigeen horjeege kooxda UGUS u qaabilsanaa arbushaadda gobolka Banaadir, kaas oo ay Xukuumaddu sheegtay in ay faah-faahinno dheeri ah qabashadiisa ka soo saari doonto, waxaana ammaan loogu soo jeediyey shirka ciidammada amniga ee sida joogtada ah howlgallada xasillinta Muqidsho iyo meelo kale oo dalka ka mid ah ka wada.
