Shirkani oo ah mid ku saleysan aayaha gobolka Hiiraan iyo dib u heshiisiin dhex marta beelaha wada daga gobolka Hiiraan ayaa maanta ka furmay magaalada Beledweyne ee xarunta gobolka Hiiraan, iyadoo ay ka qeyb galeen furitaanka shirka siyaasiyiin,waxgarad,aqoonyahano,odayaal dhaqameedyo, iyo marti sharf kale.
Furitaanka Shirka ayaa waxaa ka hadlay Nabadoon Axmed C/lle Jimcaale oo sheegay in shirka uu furanyahay islamarkaana loo baahanyahay in ay ka soo qeyb galaan waxgaradka reer hiiraan si looga tashto mustaqbalka Gobolka oo uu sheegay in dhibaatooyin badan uu qabo.
Qaar ka mid ah waxgaradkii shirka ka qeyb galay ayaa sheegay in ay ku faraxsanyihiin in shirkani uu ka furmo magaala madaxda gobolka hiiraan ayna ka rajeynayaan in wax wanaagsan oo horumar u ah dadka reer hiiraan uu ka soo baxo, waxaana ay sheegeen in loo baahanyahay in dulqaad loo yeesho doodaha shirka hareyn doono oo ay suura gal tahay dadka qaarkii in ay ku kala argti duwanaadaan laakiin muhiimadu ay tahay in laga eego dhinaca wanaagsan oo la isugu geeyo maskax.
Magaalada Beledweyne ee xarunta gobolka Hiiraan ayaa waxaa ku soo qul qulaya waxgarad,siyaasiyiin,aqoonyahano,odayaal, iyo qurbo joog ka soo jeeda gobolka Hiiraan oo ka qeyb galaya shir looga hadlayo aayaha gobolka Hiiraan, iyo dib u heshiisiin horseed u noqon karta horumarinta gobolka Hiiraan.
