Ciidamada Xoogga dalka ayaa la wareegay gacan ku haynta deegaanno iyo tuulooyin horleh oo hoosyimaada Gobolka Bakool, halkaasi oo ay ka saareen maleeshiyaadka Al-Shabaab.
Ciidamada ayaa tuulooyinka ay la wareegeen kala ah Buur-dhuxunle, Garasweyne Moora gaabay, gubadka iyo deegaanno kale, waxaaana ciidamada Dowladda oo kaashanaya kuwa Nabad Ilaalinta Midowga Afrika ee AMISOM ay howlgallo amni xaqiijin ah ka wadaan deegaannada ay kala wareegeen argagixisada Al-Shabaab, iyagoo la wareegay hub iyo saanad milateri oo ay isaga carareen Al-Shabaab kuwaasi oo ay ku jiraan hoobiyeyaal.
Taliyaha Guutada 8aad ciidanka Xoogga dalka ee gobolka Bakool Cabdiraxmaan Maxamed Cusmaan (Tima-cadde) ayaa Radio Muqdisho u xaqiijiyay deegaannada ay kala wareegeen argagixisada Al-Shabaab, isagoo xusay in shanta degmo ee ay ka koobantahay gobolka ay gacanta ugu jiraan ciidamada dowladda, dagaalkuna uu ka socdo dhulka howdka ah.
“14 goobood ayaan kala wareegnay, horjoogihii kooxda Shabaab ee u qaabilsanaa Gobolka Bakool waan ka dilnay, tuulo yar ayay ku hareen argagixisada Al-Shabaab, howgalkuna wuu sii socon doonaa, ilaa iyo inta aan ka saareyno deegaannada Gobolka Bakool ee ay kaga suganyihiin Al-Shabaab” ayuu yiri Taliyaha.
