Xafladda cashada oo si habsami leh u qabsoontay ayaa waxaa sidoo kale lagu marti-qaaday Gudoomiyaha Baarlamaanka Dawlad goboleedka Soomaaliyeed ee Puntland Siciid Xassan Shire, Wasiiro, Xildhibaano, maamulka Gobalka Mudug, Maamulka Degmada Gaalkacyo, Waxgarad, Haween iyo masuuliyiin kale.
Marwo Caasho Geelle oo ka hadashay madasha ayaa sheegtay in iyada iyo qoyskeeduba casho sharaftaan u sameeyen Madaxweynaha Maamulkaa Puntland Dr C/weli Maxamed Cali Gaas , maadama uu magaalada Gaalkacyo u joogo howlo shaqo , islamarkaana ay si wanaagsan Gobalka Mudug uga soconayaan mashaariicda horumarineed ee Dawladda Puntland fulinayso
Madaxweynaha Maamulka Puntland Dr.Cabdiweli Maxamed Cali Gaas ayaa dhankiisa uga mahadceliyey Marwo Caasho Geelle iyo cidkasta oo gacan weyn ka geysatay casho sharaftaan, haweenka Puntland ayuuna ku amaanay doorka lama ilaawaanka ah ee ay mar walba ka qaataan horumarka iyo Nabad-gelyada Dalka.
‘’Runtii waan isaga baahneyn inaan magaalada u soo baxno , howl culus oo aan kala go’ laheyn ayaan kujirnaa , habeenkiina wixii maalinti la qabtay ayaa layska waraystaa ‘’ Ayuu yiri Dr Gaas.
Munaasibadda cashada ayaa intii ay socotay lagu wada qaatay jewi wanaagsan oo saldhig u ah Nabadda iyo Horumarka baaxadda leh ee ka soconaya guud ahaan Puntland, gaar ahaana Gobalka Mudug oo dhabada wanaaga cagta saaray.
Magaalada Gaalkacyo ee xarunta Gobalka Mudug , waxay hada tartan xoog leh oo dhinac kasta ah kula jirtaa magaalooyinka kale ee Puntland iyo wadamada horumaray , xiliyada habeenkii iyo maalintii amnigeedu waxaa uu gaarsiisan yahay halkii laga rabay, taasna waxaa iska kaashaday shacabka iyo laamaha amaanka Puntland .
-DHAMMAAD-
