In ka badan 153 qof oo rayid ah ayaa ilaa hadda la xaqiijiyay in ay ku dhinteen weerarro argagixiso oo xalay ka dhacay magaalada Paris ee caasimadda dalka Faransiiska.
200 oo qof ayaa ku dhaawacantay weerarradan oo ah kuwii ugu xumaa ee soo mara daka Faransiiska.
99 ka mid ah dadka dhaawaca ah waxaa la sheegayaa in dhaawacyadoodu culus yihiin.
Wakaaladda Wararka Faransiiska ee AFP ayaa ka soo xigatay mas’uuliyiin Faransiis ah in khasaaraha dhacay uu yahay mid hor dhac ah, ay waqti kasta kor u kici karto tirade dhimashada iyo dhaawaca.
Weerarradan dhimashada badan dhaliyay waxaa fuliyay kooxo hubeysan oo weeraray garoon kubbadda lagu ciyaaro oo ku yaalla woqooyiga Paris.
Qaar ka mid ah kuwa weerarka fuliyay waxay qarxiyeen suuman qarxa oo ay wateen, halka qaar ka mid ah weerarrada loo adeegaday qoryaha darandoorriga u dhaca.
Kooxaha hubeysani waxay sidoo kale weerareen makhaayado lagu caweeyo oo ku yaalla dhanka bari ee magaalada Paris.
Booliska Paris ayaa sheegay in ugu yaraan 8 nin oo hubeysan ay ka qeyb qaateen weerarradan argagixiso, kuwaas oo 3 ka mid ah ay is qarxiyeen. Warar kale ayaa sheegay in 7 ka mid ah kuwa weerarrada qaaday ay xirnaayeen suuman qarxa, halka mid 8aadna ay boolisku toogteen.
Weerarka ugu dhimashada badani waxa uu ka dhacay hool xafladaha iyo dabbaal degyada lagu dhigo oo ku yaalla waddada 11aad ee caasimadda Paris. Halkaas waxaa ka dhacay xasuuq ay ku dhinteen 100 qof ka dib markii ay dhowr nin oo hubeysan dad ku go’doomiyeen rasaasna oodda uga qaadeen.
Sida ay ku warrameen mas’uuliyiinta Faransiisku , weerarradani waxay ka dheceen ugu yaraan 7 goobood ugu yaraan mid ka mid ahna waxa uu ahaa ismiidaamin.
