Munaasabad balaaran oo lagu maamuusayay maalinta Macalinta Soomaaliyeed ayaa maanta lagu qabtay xarunta xanaanada agoonta gabdhaha Boondheere ee magaalada Muqdisho.
Munaasabadda xuska maalinta macalinta Soomaliyeed oo uu soo qaban qabiyay ururka macalimiinta Qaranka Soomaaliyeed ayaa waxaa ka qeybgalay gudoomiyaha isutagga Midowga ururada shaqaalaha Soomaaliyeed Maxamed Cismaan Xaaji, gudoomiyaha ururka macaliminta Qaranka Soomaaliyeed Macalin Yaroow, gudoomiye ku xigeenka uruka Macalimiinta Qaranka marwo Nuurto Maxamed Caddoow, macalimiin, waalidiin iyo marti sharaf kale.
Ubaxa xarunta xanaanada gabdhaha Boondheere ayaa halkaasi ku soo bandhigay heeso qiiro leh oo ay ku muujinayeen qiimaha macalinka Soomaaliyeed, waxaana ubaxaasi ka dhex muuqday fanaanadda Muslimo Qaasin Hilowle oo ah macalin suugaaneed.
Ugu horeynti munaasabadda waxaa ka hadlay Sahro Xasan Axmed oo ku hadashay magaca macalimiinta Soomaaliyeed oo ku dheeraatay qiimaha macalinka Soomaaliyeed iyo duruufaha adag ee uu ku shaqeeyo.
Gudoomiye ku xigeenka ururka macalimiinta Qaranka Soomaaliyeed Nuurto Maxamed Caddoow oo ka hadashay munasabadaasi ayaa hambalyo u dirtay macalimiinta Soomaaliyeed, iyadoo ku bogaadisay howsha adag oo ay u hayaan ummadda Soomaaliyeed, waxeyna u rajeeysay horumar iyo baraare.
Nuurto Maxamed Caddoow oo ah gudoomiye ku xigeenka ururka macalimiinta Qaranka Soomaaliyeed ahna maamulaha xarunta xanaanada gabdhaha agoonta ee Boondheer ayaa sheegtay in ururka macalimiinta Qaranka uu dadaal ugu jiro mideynta macalimiinta Soomaaliyeed.
Gudoomiyaha isutagga midowga ururada shaqaalaha Soomaaliyeed Maxamed Cismaan Xaaji ayaa macalimiinta Soomaaliyeed ugu hambalyeeyay maalinta macalinka, ayaa ka hadlay waxqabadka iyo qiimaha uu macaliminka Soomaaliyeed u leeyahay bulshada Soomaaliyeed.
Xuska maalinta macalinka Soomaaliyeed oo ku asteysan 21 Novembar ayaa ku beegan maalinta berri ah, iyadoo ururka macalimiinta Qaranka Soomaaliyeedna uu xuska maalintaasi maanta oo jimco ah ku qabtay Muqdisho .
