Shabakadda Wararka Kulmiye iyo Bahda Saxaafadda ayaa maanta si wadajir ah magaalada Muqdisho xaflad qado sharaf ah ugu sameeyay Cayaartoyda 11-jirada Soomaaliya ku matalayay Koobkii Iskuulada Jaamacadda Carabta ee lagu qabtay magaalada Doha ee Dalka Qatar.
Xafladda ayaa waxaa Goobjoog ahaa Bahda Saxafadda, Cayaartooy hore, Macalimiinta Da’yarta maanta xafladda loo dhigay, Maamulka Iskuulka ay ka socdeen iyo waliba Cayaartooyada Da’yarta ah oo wajiyadooda ay farxad ka muuqatay.
Mas’uuliyiintii magaca bahda Saxafadda ku hadlay waxaa ka mid ahaa Agaasimaha Tv-ga Horn Cable ee Muqdisho C/qaadir Maxamed Faarax Dulyar, Agaasimha Tv-ga Somali Chanel C/risaaq Jaamac Cilmi Black iyo Wakiilka Wakaalada Wararka AP Faarax Cabdi Warsame Faarax AP, kuwaasi oo dhamantood bogaadiyey guulaha ay Qaranka u soo hooyeen Cayaartooyda Da’yarta ah.
Agaasimaha Radio Kulmiye Abwaan Cismaan Cabdullaahi Guure ayaa ugu horeyn geesiyaasha 11-jirada ah ugu Hambalyeeyay Guulihii ay soo hooyeen iyo sida ay u ilaaliyeen magaca Ummadda Soomaaliyeed, waxaana uu ku dhiiri geliyay Cayaartooyda Da’yarta ah in ay sii wadaan dadaalada nuucaan oo kale ah islamarkaana ku tilmaamay Jiil u soo baxay Soomaaliya Mustaqbalkana matali doona Qaranka Soomaaliya.
Agaasimaha Wakaaladda Wararka Soomaaliyeed ee SONNA C/raxmaan Sheekh Yuusuf Al-Cadaala ayaa tilmaamay in dhallinyaradan ay mudanyihiin soo dhaweynta intan ka badan, waxaana uu ku baaqay in si wada jir ah ay bulshada ugu istaagto dhiiri gelinta da’yarta 11-da dalkeena ee magaca ka soo hooyey tartankii lagu qabtay dalka Qatar.
Dhanka kale waxaa halkaa Shahaadooyin Dhiiro galin ah lagu Guddoonsiiyay Dhamaan Cayaartooydii, Maamulka iyo Macalimiinta Iskuulka Muqdisho.
Sawir Qaade:- C/llaahi Suldaan
