Mudane C/raxmaan Maxamed Xuseen (Odawaa) oo ah Wasiirka Arrimaha Gudaha iyo Federaalka ayaa maanta ka qeybgalay kulan looga hadlayay ammaanka iyo horumarka caasimadda dalka kaasoo ka dhacay xarunta dowladda hoose ee Muqdisho.
Kulanka ayaa sidoo kale waxaa ka qeybgalay guddoomiye ku xigeenkada gobolka Banaadir, Agaasimayaasha dowladda Hoose iyo guddoomiyeyaasha 17-ka degmo ee Gobolka Banaadir.
Intii uu socday kulanka ayaa looga hadlay arrimaha amniga, nadaafadda iyo horumarka, iyadoo si gaar ah Wasiirka ugala hadlay Mas’uuliyiinta gobolka horumarinta adeegyada bulshada.
Ku simaha guddoomiyaha Gobolka Banaadir ahna guddoomiye ku xigeenka gobolka Maxamed Axmed Diiriye ayaa ugu horeyn uga warbixiyay Wasiirka Arrimaha gudaha waxyaabaha u qabsoomay maamulka, ee la xiriira dhinacyada amniga, nadaafadda, iyo dhismayaasha wadooyinka.
Mudane C/raxmaan Maxamed Xuseen “Odawaa” ayaa bogaadiyay mas’uuliyiinta gobolka waxqabadka ay muujiyeen, isagoo xusay in dib loo dhisay wadooyin muhiim ah, sida wadada isku xirta Sayidka iyo Bakaaraha iyo tan Buulo Xuubey.
