Gudoomiye Kuxigeenka Arimaha Bulshada Gobolka Hiiraan, Sheekh Xuseen Cismaan Cali oo la hadlay warbaahinta ayaa sheegay in wax laga xumaado ay tahay dagaal beeleedyada dib uga soo cusboonaaday gobolka Hiiraan, waxa uuna beelaha dagaalamaya ugu baaqay xabad joojin deg deg ah.
“Waa wax laga xumaado in beelo walaalo ah oo wada daga ay dano qabiil isku dilaan. Sidaa daraadeed odayaasha iyo waxgaradka beelaha dagaalamaya waxaan ugu baaqeynaa in ka shaqeeyaan dhex dhexaadinta beelaha walaalaha ku dagaalamayo gudaha magaalada Beledweyne ee xarunta gobolka Hiiraan” ayuu yiri, Gudoomiye Kuxigeenka Arimaha Bulshada Gobolka Hiiraan, Sheekh Xuseen Cismaan Cali.
Dagaalka haatan ka socdo xaafada Howlwadaag ee magaalada Beledweyne waxa uu daba socdaa dagaalo horay uga dhacay halkaas oo la xiriira aano qabiil.
