Ciidamada Xoogga Dalka Soomaaliyeed oo kaashanaya kuwa Midowga Afrika ee AMISOM ayaa waxa ay howllo lagu baacsanaayo nabad diidka Al-shabaab ka sameeyeen deegaano ka tirsan gobolka Bakool ee Koofurta Soomaaliya.
Taliyaha Qeybta Sideedaad ee Ciidamada Qalabka-sida ee Soomaaliya, Cali Maxamed Siciid oo la hadlay Warbaahinta Qaranka ayaa sheegay in ciidamada dowladda iyo kuwa AMISOM ay fuliyeen howlgallo la iskugu furaayo wadooyinka gobolka Bakool oo baryahaan danbe ay jidgooyooyin dhigteen maleyshiyaad ku labisan dareeska ciidamada dowladda, waxa uuna sidoo kale xusay in ciidamada ay si gaar ah u ugaarsanayeen maleyshiyaad ka tirsan haraaadiga Al-shabaab ee ku dhuumaaleysanaya deegaanada gobolka Bakool ee Koofurta Soomaaliya.
“Ciidamada dowladda iyo kuwa AMISOM waxa ay isbuucyadaan wadeen howlgallo isdaba joog ah oo la iskugu furaayo wadooyinka gobolka Bakool. Sidoo kale howlgallada ciidamada ayaa waxaa lagu ugaarsanayay haraadiga nabad diidak Al-shabaab ee ku dhuumaaleysanayo deegaanada Bakool, waxa ayna ciidamada ay howlkooda ku soo qabteen horjooge ka tirsan Shabaab oo ku sugnaa maagaalada Waajid ee gobolka Bakool” ayuu yiri, Taliyaha Qeybta Sideedaad ee Ciidamada Qalabka-sida ee Soomaaliya, Cali Maxamed Siciid.
Howlkaan ayaa waxa uu ka mid yahay howlgallo is xig xiga oo lagu ugaarsanayo kooxaha lidka ku ah midnimada iyo wadajirka shacabka Soomaaliyeed ee ku dhaqan gobollada dalka.
