Dhamaan ardayda wax ka barata Kulliyadaha kala duwan ee Jaamacadda Jazeera ayaa iska soo uruuriyay lacag gaareysa $2000.000, kadibna ku wareejiyay gudoomiyaha guddiga gurmadka gabadha Sheekh C/ Xayyi Sheekh Aadem Xassan, waxaana lasheegay in Xaawa Maxamuud Cali uu ku dhacay xanuunka qatarta badan ee Kansar.
Ardaydaan ayaa ka damqatay inantan yar kadib markii warbixinteeda ay ka heleen Axmed Abshir Geedi oo u ololeeyay arrimaha bulshada kana mid ah guddiga gurmadka u sameynaya gabadhan yar ee reerkeedu awoodda badan u laheyn iney gargaar caafimaad oo dibadda ah geeyaan xilli guud ahaan dhakhaatiirta ku shaqada leh xanuunada indhaha & aragga ay sheegeen inaaney waxba uga qaban karin gudaha dalka Xaawa Maxamuud Cali una baahantahay gargaar caafimaad oo deg deg badan oo dalka dibaddiisa ah.
Saadaam C/llaahi Cusmaan oo wakiil ka ahaa guud ahaan ardayda Jaamacadda Jazeera ayaa sheegay iney ardaydu ka jareen jeebkooda wixii tabar ah ay kari kareen maadaaba iyaguba ay yihiin dad lakaalmeeyo oo arday ah balse ladamqaday dhibta culeyska badan ee haysata Xaawa & reerkooda intaba, isagoona intaa ku sii daray iney joogteyn doonaan garab istaagga dadka liita, wuxuuna baaq u diray ardayda kale ee wax ka barta gudaha Muqdisho, gobolada dalka & dibadda intaba si loo kaalmeeyo inantaan u baahan garab istaagga.
Sheekh C/xayyi Sheekh Aadem Xassan oo ah gudoomiyaha guddiga gurmadka gabadha ayaa kaga mahadceliyay ardayda Jaamacadda Jazeera & hooyooyinka soomaaliyeed ee ku nool dalka maraykanka deeqda lacageed ee gaaraysa $2580.00, waxaana wakiil ka ahayd deeqda hooyooyinka mareykanka oo gaaraysay $580 Maama Safiya Diiriye Maxamed oo lagu yaqaano naxariista isagoona Allaah uga baryay inuu ka abaalmariyo guud ahaan dadkii soomaaliyeed ee garab istaagay inantaan dhibanaha ah oo ay ku jiraan jamaacada masaajidyada muqdisho oo aad ugu gurmaday ilmahan yar ee dhibaatadu ku heysato magaalada muqdisho.
Dr Xuseen Abshir ayaa hadda latacaalaya inanta iyadoona lajiifiyay isbitaalka Jaamacadda Soomaalia (UNISO) howlwadaag magaalada muqdisho, waxaana Dr Xuseen Abshir & Jaamacadda Soomaaliya intaba looga mahadcelinayaa garab istaagga & naxariista qiimaha badan ee ay u sameynayaan inantaan iyagoona sheegay iney joogteyn doonaan kaalmada & garabsiinta gabadhan yar ee xanuunka qatarta badan haysto.
Ugu dambeyn waxaa socdaa dadaalkii ugu dambeeyay ee Xaawa Yariisey loogu qaadi lahaa dalka india, iyadoona xusid mudantahay in maamulada Emigration ka & Isbitaalka Kalkaal ay bilaash ugu sameeyeen Passports ka & Visa-ha dalku galka india, waxaana lagu wadaa in dhawaan ladiro Xaawa Inshaa Allaah.
Faahfaahinta Axmed Abshir Geedi, guddiga gabdha 00252615535508.
