RADIO MUQDISHO:-Taliska Ciidanka Militariga Dawladda colombiya ayaa shaaciyey in saddex askari oo kamid ahaa Ciidnkooda la dilay halka ugu yaraan 16 kalena ay dhaawacmeen, ka dib weerar loo adeegsaday diyaaradaha aan duuliyaha lahayn “Drones” oo lagu qaaday saldhig ciidan oo ku yaalla magaalada Santa Rosa del Sur ee dhacda waqooyiga dalkaasi Colombiya.
Taliyaha Ciidamada Militariga Colombia Major General José Bertulfo Soto, ayaa sheegay in weerarku uu ahaa mid gaadmo ah isla markaana lagu dilay 3 askari laguna dhaawacay 16 askari oo kale oo kujiray xeradaas, balse taliyuhu ma bixin xog ku salaysan cidda ka dambeysay weerarkan.
Xogo dheeraad ah oo laga helayo dalka Colombia ayaa sheegaya in loo malaynayo in weerarkan ay gaysteen kooxaha fallaagada ah ee dalkaasi, maadaama oo uu jiro iskaashi ka dhexeeya kooxaha ka ganacsada daroogada iyo kooxaha fallaagada ah ee dalkaas, kuwaas oo si wadajir ah oo joogto ah u weerara goobaha Ciidamada Colombia, iyadoo uu ugu danbeyey weerarkii toddobaadkii hore lagu qaaday saldhig ciidan oo ku yaalla magaalada Cúcuta ee gobolka Tolima kaasi oo loo adeegsaday gantaallo laga sameeyay haamaha gaaska, waxaana weerarkaas ka dhashay dhimashada afar qof oo rayid ah.
Madaxweynaha Dawladda Colombia Abelardo de la Espriella ayaa sheegay in daba gal iyo baaritaano dheeraad ah lagu samayn doono cidda gaysattay weerarkan isla markana ay tallaabo ka qaadi doonaan.
“Weerar kasta oo lala beegsado askarteena wuxuu sii xoojinayaa oo kaliya go’aankeena ku aaddan difaaca Colombia.” ayuu yiri Abelardo de la Espriella.
Rabshadaha hubaysan ayaa si xawli ah ugu sii kordhayay dhowr gobol oo miyi ah oo ku yaalla dalka Colombia tan iyo markii Madaxweyne De la Espriella uu xilka la wareegay bishii Agoosto ee sanadkan 2026, waxaase jira qorshayaal militari oo ay Dawladdiisu diyaarinayso si ay u wajahdo kooxaha hubaysan iyo kooxaha kale ee daroogada ka ganacsada.
