Mas’uuliyiin ka tirsan wasaaradda arrimaha gudaha ayaa kormeer ku tagay degmada Cadale ee gobolka Shabeellaha dhexe iyagoo soo indha indheeyay xaaladda nololeed ee bulshada.
Mas’uuliyiinta ayaa warbixin ka dhageystay qaar ka mid ah bulshada ku dhaqan degmada Cadale, kuwaas oo sheegay in halki ceel oo ku yaalay degmadaasi ay matoorki ka qaateen maleeshiyaadki Shabaab, iyagoo xusay iney u baahanyihiin dib u soo celinta adeegyadii lagama maarmaanka u ahaa noloshooda.
Gudoomiyaha degmada Cadale Muxudiin Suudi Macalin ayaa sidoo kale sheegay in dadka ku dhaqan degmada Cadale ay la soo derseen duruufo kala duwan oo dhinaca nolosha ah, wuxuuna ka dalbaday wasaaradda arrimaha gudaha iney dib u soo noleyso adeegyada bulshada sida waxbarashada, caafimaadka biyaha iyo korontada.
Ciise Maxamuud Samoow oo ah la taliyaha dib u heshiisiinta ee wasaaradda arrimaha gudaha ayaa sheegay in wasaaraddu ay wax ka qaban doonto baahida dadka ku nool degmada Cadale, isagoo ka mahadceliyay sida diirran ee loogu soo dhaweeyay wafdiga uu horkacayo degmadaasi Cadale.
