Wasiirka Warfaafinta, dhaqanka iyo Dalxiiska ee Xukuumadda Soomaaliya Mudane Maxamed Cabdi Xayir Maareeye ayaa caawa soo gabo gabeeyay tartan cilmiyeedka Warbaahinta Qaranka oo sanadkan ay ka qeyb galeen 28 degmo oo ka kala tirsan gobollada dalka oo ay ugu badnaayeen degmooyinka Gobollka Banadir.
Munaasabadda xiritaanka tartan cilmiyeedka Warbaahinta Qaranka waxaa ka kaloo ka qeyb galay guddiga tartan cilmiyeedka, Agaasimaha telefishinka Qaranka iyo Abwaan Maki Xaaji Banaadir.
Guddoomiyaha tartan cilmiyeedka Warbaahinta Qaranka Maxamed Abuukar Axmed Ma’da oo kulanka hadal kooban ka jeediyay ayaa uga mahadceliyay tartamayaasha ka qeyb galay tartanka sida quruxda badan ee ay ku soo bandhigeen aqoontooda, isagoo mahadcelin gaar ah u jeediyay daadihiyeyaasha iyo gudiga tartanka oo u dhabar adeegay muddada uu tartanka socday.
Agaasimaha Telefishinka Qaranka Mudane Cabdinaasir Xuseen Xasan ayaa sheegay in sanadka soo socda ay wax badan ka badali doonaan tartan cilmiyeedka Warbaahinta Qaranka, isla markaana fursado la siiin doono Jaaliyadaha Soomaaliyeed ee dalka dibadiisa ku dhaqan inay u tartami karaan degmada ay ka so jeedaan.
Wasiirka Warfaafinta, dhaqanka iyo Dalxiiska ee Xukuumadda Soomaaliya Mudane Maxamed Cabdi Xayir Maareeye oo soo xiray tartan cilmiyeedka ayaa ugu horeyn maamulka gobolka uga mahadceliyay taabo gelinta tartanka, isagoo hambalyo taa la mid ah u diray tartamayasha kala galay kaalimaha 1aad, 2aad iyo 3aad oo kala ah Warta Nabadda, Yaashiid iyo Boosaso oo ah xarunta Gobolka Bari.
Wasiir Maareeye ayaa sheegay in dowladda ay martiqaad u sameyn doonto tartamayaasha degmada Boosaaso oo galay kaalinta saddexaad, maadaama xafladda abaal marinta ah ay ka dhici doonto magaalada Muqdisho.
Warta Nabadda ayaa heleysa 3,000 (saddex kun oo doolar,) waxaana tartamayasha degmada Yaaqshiid ay helayaan 2,000 (Labo kun oo dolar) halka tartamayasha degmada Boosaaso ay helayaan 1,000 (kun doolar).
Sawir Qaade:- Farxaan Suleymaan Daahir
