Wafdi ka socda wasaaradda warfaafinta dhaqanka iyo dalkxiiska ee xukuumadda Federaalka Soomaaliya uuna hoggaaminayo agaasimaha guud ee wasaaradda mudane C/risaaq Cali Yuusuf “Bahlaawi” ayaa maanta ka degay garoonka diyaaradaha ee magaalada Baydhabo halkaasoo si diirran loogu soo dhaweeyay.
Xubnaha wafdiga waxaa ka mid ah agaasimaha guud ee wakaaladda wararka Soomaaliyeed ee SONNA. mudane C/raxmaan Yuusuf Sheekh “Al-cadaalla”, agaasimaha waaxda shaqaalaha mudane C/raxiin Ciise Caddoow, iyo mas’uuliyiin kale oo ka tirsan wasaaradda warfaafinta.
Mas’uuliyiintaasi ayaa lagu wadaa in halkaasi ay ka furaan xafiis ay leedahay wakaaladda wararka Soomaaliyeed ee SONNA, oo si dhameystiran uga howlgali doona deegaannada hoos yimaada maamulka Koofur-galbeed ee Soomaaliya.
Waa xafiiskii labaad ee wakaaladda wararka Soomaaliyeed ee SONNA ay ka furato gobollada dalka, iyadoo xafiiskii kan ka horeeyay ay wakaaladdu ka duratay magaalada Kismaayo oo xarun ah maamulka Jubbaland.
