Taliyaha ciidanka booliiska Soomaaliya sareeyo gaas Maxamed Sheekh Xaamud, oo maanta dalka dib ugu soo laabtay ayaa la kulmay saraakiil ka socotay booliiska dalka Mareykanka oo dhowaanahan ku sugnaa dalka isla markaana u kuurgalayay xaaladda booliiska Soomaaliya.
Sareeyo gaas Maxamed Sheekh Xasan Xaamud taliyaha ciidanka booliiska Soomaaliyeed ayaa sheegay in saraakiisha booliika Mareykanka uu kala wareegay saanad ciidan oo loogu talagalay booliiska dalka.
“Runtii waan ugu mahadceliyay sida ay noo soo xasuusteen oo mucaawadanii yareyd oo ay na soo gaarsiiyeen oo runtii anaga wax badan noo taraysa,” ayuu yiri taliyaha booliiska.
Taliyaha booliiska ayaa sidoo kale sheegay in booliiska Soomaaliyeed uu dhismaayo isla markaana ay ku dadaalayaan sidii xiriir ula yeelan lahaayeen wadamada daneeya arimaha Soomaaliya.
Dhanka kale, taliyaha ayaa tacsi u direy dadkii ku waxyeeloobay qaraxii maanta ka dhacay agagaarka garoonka diyaaradaha ee Aadan Cadde, isagoo sheegay in falalkan carqaladeynta ah aysan ka hor istaagi doonin horumarka iyo dowladnimada Soomaaliya.
“Horumarka ka badan dowladnimada ka balaaran ummadda meesha ay goosato ayaa ka badan, wax kasta oo dhaca anaga xagee u socnaa? Waxaa u socnaa dhisidda dowladnimada Soomaaliya oo 25 sano ka hor burburtay,” ayuu markale yiri taliye Xaamud.
Taliye Xaamud ayaa saraakiisha tababarka ugu socdo dugsiga sare ee booliiska Soomaaliya ee janaraal Kaahiye, waxaa uu u sheegay in ay taliska booliiska Soomaaliya uu ku howlan yahay dib u dhiska iyo soo celinta heybaddii booliiska dalka.
