Abaanduulaha qeybta 21-aad ee ciidanka XDS Col cirro oo wareysi siiyay Radio Muqdisho ayaa faahfaahin ka bixiyay howlgallada ay ciidamada XDS gaar ahaan qeybta 21-aad ay ka wadaan goboollada dhexe ee dalka kuwaas oo ka dhan ah maleeshiyaadka Shabaab.
G/sare C/llaahi Aadan Xuseen “Col Cirro” abaanduulaha qeybta 21-aad ee ciidanka XDS ayaa xusay in ciidamadu ay howlgallo ballaaran ka wadaan deegaanno ka mid ah gobollada dhexe ee dalka, isagoo xusay in howlgalladaasi xooggooda ay ka socdaan bariga gobolka Galgaduud iyo deegaanno kale oo ka mid ah Mudug iyo Hiiraan.
Wuxuu tilmaamay in maleeshiyaadka Shabaab ay ciidamadu ka xoreeyeen deegaanno muhiim ah oo ay dadka ku dhibaateeyn jireen islamarkaana ay ku soo celiyeen ammaanki iyo kala dambeynti.
Abaanduulaha oo hadalkiisa sii wata ayaa xusay in howlgalladu ay sii socon doonaan tan iyo inta maleeshiyaadka Shabaab laga sifeeynayo dalka oo dhan, si dalka looga dhigo meel nabad ah oo ka caaggan argagixisada.
Dhinaca kale Abaanduulaha ayaa hoosta ka xariiqay in ciidamadu ay ku guuleeysteen iney ka hortagaan dagaal beeleedyo ka dhacay deegaanno ka mid ah gobolka Gaduud, isagoo tibaaxay in ciidamada XDS aysan u dulqaadan doonin fal kasta oo ka dhan ah nabadgelyada sida dagaalbeeleedyada.
Col Cirro ayaa ku boorriyay dhalinyarada la marin habaabiyay ee weli ka sii mid ah maleeshiyaadka Shabaab iney ka faa’iideystaan cafiski uu u fidiyay madaxweynaha dalka, ayna isaga soo baxaan argagixisada Shabaab si ay dib ula midoobaan qoysaskooda.
