Magaalada Cadaado ee Gobolka Galgaduud oo hadda xarun KMG u ah dawlad goboleedka Galmudug ayaa waxaa ka bilowday ololaha doorashada iyo dhaqdhaqaaqyo siyaasadeed oo la xiriira, maadaama lagu dooranayo Xildhibaanada Federaalka ee deegaanada Galmudug Baarlamanka ka soo galaya.
Magaalada ayaa waxaa soo gaaraya wufuud kala duwan, waxaana bilowday doodo iyo shirar arrimahaasi ku aadan.
Cabdullahi Maxamed Shirwac Guddoomiyaha daladda ururrada bulshada rayidka ah ee SOSHENSA waxa uu ka mid yahay dadka maanta soo gaaray Cadaado, iyagoo shir wadatashi bulsho ah ku qabanaya magaalada, kaasi oo shacabka qeybaheeda kala duwan ay kaga hadlayaan hanaanka doorashada.
Dhinaca kale Haweenka ayaa wada olole gooni ah oo ay ugu jiraan inay qoodo ka helaan Ergada iyo xubnaha Baarlamankaba.
Aamina Xaaji Cilmi oo madax u ah Hay’adda SSWC oo maanta Cadaado lagu soo dhaweeyay ayaa sheegtay inay ku rajo weyntahay in isbadalkan cusub uu dalka u horseedo horumar, Haweenkuna ay qoondadooda helaan.
