Safaaradda Soomaaliya ee dalka Kenya ayaa maanta tababar ku saabsan diblomaasiyadda u soo xirtay ku dhawaad 20 qof oo ka mid ah shaqaalaha ka how gala safaaradda.
Danjire ku xigeenka ahna qunsulka koowaad ee safaaradda Maxamed A. Sheekh Cusmaan oo soo xiray tababarkaan ayaa sheegay in safaaraddu ay ku dadaalayso sidii sare loogu qaadi lahaa wacyiga iyo awoodda shaqaalaha ka howl gala safaaradda.
“Hadafku waa in aan awood u yeelanno in aan si wanaagsan ugu shaqeyno dalkeena, gaar in diplomaasiyiintu ay awood u yeeshaan fulinta siyaasadda arrimaha dibadda ee Soomaaliya. Aad ayaan ugu mahad celinayaa Dr. Ibraahim oo tababarkaan fududeeyay iyo shaqaalaha ka qeyb galay” ayuu yiri Maxamed Amiin.
Dr. Ibraahin Faarax Bursaliid oo tababarkaan bixinayay muddo laba toddobaad ah ayaa sheegay in koorsooyinka noocaan ah ay wax badan ku soo kordhin karaan howl-gallada dibadda ee Soomaaliya. Si gaar ah ayaa uu u amaanay diblomaasiyiintii ka qeyb galay tababarka oo ka howlgala qeybaha ay safaaraddu ka kooban tahay.
Sawir Qaade: Cabdulqaadir Koronto.
