Related posts
Jaaliyadda Soomaaliyeed ee Wadanka Austria ayaa deeq lacageed oo gaareysa 8,500 (Sideed kun iyo shan boqol) oo dollar oo ah wajiga koowaad ku wareejiyay guddiga abaaraha, si wax loogu qabto dadka ay abaartu ku saameysay qeybo ka mid ah gobollada dalka.
Cabdalle Buraale oo ah suxufi degan wadanka Austria kana mid ah Jaaliyadda Soomaaliyeed ee dalkaasi ayaa Radio Muqdisho u sheegay in wajiga koowaad ee gurmadka abaaraha ay ku wareejiyeen guddig gurmadka abaaraha Soomaaliya, ayna qorsheynayaan inay bilaabaan wajiga labaad oo kaalmo dhaqaale loogu uruurinayo dadka ay abaartu ku habsatay ee ku nool qaar ka mid ah gobollda dalka.
“Waxaa hada noo bilaabatay wajiga labaad ee aan kaalmo ugu uruurinayo dadka ay abaartu heysato, si loo yareeyo xajmiga abaarta, waxaana rajeyneynaa in lacagta ay ka badato tii hore ee ay Jaaliyadda iska soo uruuriyeen” ayuu yiri Cabdalle.
Wariye Cabdalle Buraale ayaa ugu baaqay guud ahaan shacabka Soomaaliyeed meelkasta oo ay joogaan inay ka qeyb qaataan dib u dhiska dalkooda iyo taageeridda dowladda, isagoo intaa ku daray in horumar lagu gaari karo in dadku ay gacmaha is qabsadaan oo qofkasta uu caawiyo walaalkiis aan waxba heysanin.
Halkan ka dhageyso wareysiga Cabdalle Buraale oo dhameystiran
