Ra’isulwasaaraha Xukuumadda Federaalka Soomaaliya Mudane Xasan Cali Kheyre oo caawa la hadlay Warbaahinta Qaranka ayaa ka hadlay weerarkii ay argigixisadu gelinkii dambe ee maanta ku xasuuqeen shacab Soomaaliyeed oo aan waxba galabsan.
“INAA LILAAHI WA INAA ILEEYHI RAAJICUUN, Waxaan halkaan tacsi tiiraanyo leh uga diraayaa dhammaan qoysaskii iyo ehelladii ay ka geeriyoodeen dadkii ay weerarkii arxan darada ah u geysteen Shabaabku maanta, waxaan dhammaan umadda Soomaaliyeed mar kale xasuusinayaa inaan u gurmanno dadkii meesha wax ku noqday oo aan Alle u barino” ayuu hadalkiisa ku bilaabay Ra’isulwasaare Kheyre.
“maanta qaraxii meesha ka dhacay waxa uu tilmaamayaa dhowr waxyaabood, koow waxa uu ahaa musiibo qaran oo aan rajeynayo in umadda Soomaaliyeed ay gacmaha isqabsan doonaan si aan uga soo kabsano, tan labaad waxa uu ahaa fariintii ugu dambeysay ee ay noosoo diraan kooxda Shabaab fariintaasoo aheyd inaanay ka naxeyn shacabka Soomaaliyeed, inaanay ka naxeyn carruur, inaanay ka naxeyn Hooyo, waayo waxa ay la beegsadeen meeshii ugu mashquulka badneyn Muqdisho” ayuu hadalkiisa sii raaciyey Ra’isulwasaaraha Xukuumadda.
Ugu dambeyntii waxa uu fariin u diray shacabka Soomaaliyeed isaga oo dhinaca kalena ka hadlay jawaabta ay Xukuumaddu ka bixin doonto ficilkan, dhinaca kalena waxa uu Ra’isulwasaare Kheyre ka hadlay gurmadka ay Dowaddu u sameysay dadki Shacabka ahaa ee ay waxyeeladu so gaartay.
Hoos Ka Dhageyso Hadalka Ra’isulwasaaraha:-
