Madaxweynaha dalka Ereteriya Mudane Isaias Afwerki oo hadal ka jeedinayay munaasabad soo dhoweeyn ah oo madaxweyne Farmaajo iyo Wafdigiisa loogu sameeyay magaalada Asmara ayaa marka hore sheegay iney farxad weyn u tahay inuu ku soo dhoweeyo gurigooda Wafdiga madaxweynaha Soomaaliya ee booqday Ereteriya.
“Anigoo ku hadlaya magaca dowladda iyo shacabka dalka Eriteriya waxaa farxad weyn ii ah in aan idin ku soo dhaweeyo gurigiina labaad Mudane Madaxweyne adiga iyo wafdigaaga sharafta leh”.
Madaxweyne Isaias Afwerki oo ka hadlayay xiriirka ka dhaxeeya Labada dalka ayaa Yiri’ Xiriirrada taariikhiga ah ee u dhexeeya labada shacab ee Ereteriya iyo Soomaaliya waxay ka soo unkameen bah-wadaagta aan ku nahay xadaaradihii hore ee ka jiray gobolka Geeska Afrika iyo in aan xisaabsannahay qaybta koonfureed ee Jasiiradda Carabta”.
Waxaan ku faannaa taariikhdan. Ixtiraamka dadka Eriteriya ay u hayaan walaalahooda Soomaaliya ayaa ku ku saleysan sooyaalkan wada jirka ah ee faca weyn.
Sidoo kale Mudane Isaias Afwerki ayaa sheegay in wax badan laga bartay caqabadahii hore ee inoo soo maray tobannaankii sano ee la soo dhaafay. Dhammaanteen Soomaaliya, Itoobiya, Eriteriya iyo Suudaan waxa aynu si dhab ah ugu istaagnay dib u dhiska dalalkeenna, innagoona haysanna fursad taariikhi ah aynu ku dhisan karno iskaashi buuxa ee dalalka Gobolka Geeska Afrika.
“Inkastoo dhibaatooyinka nasoo maray ay badnaayeen, haddana waxaa muuqata in aan maanta galnay marxalad cusub, maadama aysan waligeed sii jireyn colaadaha iyo xasillooni darradu, waxayna u egtahay in haatan ay dhammaad yihiin”, ayuu ku yiri Isaias Afwerki Khudbadka uu ka jeediyay munaasabadda lagu soo dhoweeynayay madaxweyne Farmaajo iyo Wafdigiisa ee Asmara.
Madaxweynaha dalka Eriteriya oo soo hadal qaaday arrimaha Soomaaliya ayaa sheegay inuusan shaki ku jirin in dadka Soomaaliyeed sida ugu dhaqsiyaha badan ula jaan qaadayaan hayaanka horumarka ay umba qaadeen dalalka Itoobiya iyo Eritrea.
“Mudane Madaxweyne,Waxaad ii ogolaataa inaan mar labaad kuu xaqiijiyo sida aan ugu kalsoonahay kaalinta wax ku oolka ah ee shacabka Soomaaliyeed ay ku leeyihiin xaqiijinta iskaashiga aadka u sareeya ee aynu qorsheynayno. Waxan kuu rajeynayaa guul weyn oo ku aadan ka miradhalinta dadaalada aad ku howlantahay, waxan kaloo kuu rajeynayaa in aad ka gudubtaan caqabadaha idin horyaala oo aadna kaalintiina ka qaadataan iskaashiga amni iyo dhaqaale gobolka,’ ayuu ku soo gunaanaday Khudbadkiisa madaxweynaha dalka Eriteriya Isaias Afwerki.
Madaxweynaha Jamhuuriyadda Federaalka Soomaaliya Mudane Maxamed C/llaahi Farmaajo iyo Wafdi uu hogaaminayo ayaa waxay safar taariikhi ah ku joogaan magaalada Asmara ee caasimadda dalka Eriteria,isagoona kullamo Taariikhi ah kula yeeshay madaxda ugu sareysa dalka Eriteriya oo uu ugu horeeyo madaxweyne Isaias Afwerki.
