Wafdigani uu horkacayo Wasiir ku-xigeenka Wasaaradda Maaliyadda Xukuumada Federaalka Soomaaliya oo ay wehliyeen Wasiiro iyo xubno kale ayaa maanta si weyn loogu soo dhoweeyey magaalada Xudur ee Gobolka Bakool.
Soo dhoweyn kaddib Wasiirka iyo Wafdigiisa waxaa loo galbiyey xaruunta Dugsi Sare oo dhowaan dayactir iyo dhismo cusub lagu sameeyey, waxayna booqdeen qeybaha kala duwan ee dhismaha Iskuulka uu ka kooban yahay, iyagoo u kuurgaley tayada dhismaha iyo qalabeynta lagu sameeyey iyo gaari iskuulka uu leeyahay oo halkaa lagu soo bandhigey, waxayna xarigga ka jareen dhismaha Iskuulka Dugsiga Sare ee Xudur laga hirgeliyay.
Intaa kaddib waxay kulan isxogwareysi ah la qaateen Maamulka Gobolka iyo bahda Waxbarashada ugu horeyn Guddoomiya Gobolka Bakool Maxamed Cabdi Tool oo soo dhoweeyey wafdiga ayaa Wasaaradda Maaliyada ku amaanay doorka ay ka qaadatay dib u dhiska lagu sameeyey dugsigani.
Cali Xaaji Aadan Madaxa Mashruuca Horumarinta Gobolada, Wasiirka Wasaarada Waxbarashada Maamulka koonfur Galbeed Cabdiraxmaan Cismaan Malaaq iyo Lataliyaha Madaxweynaha Koonfur Galbeed dhinaca Haweenka iyo Xuquuqul Insaanka Marwo Aamina Maxamed Mursal ayaa hadalo kooban ka soo jeediyey kulanka waxayna aad u bogaadiyeen horumarada ka socda Gobolka Bakool gaar ahaan Degmada Xudur.
Gabagabadii Wasiir ku xigeenka Wasaaradda Maaliyadda Xukuumada Federaalka Soomaaliya Mudane Cabdullaahi Sheekh Cali (Qolocow) oo kulanka soo xiray ayaa la dardaarmey Maamulka Gobolka, Bahda Waxbarashada iyo Wasiiradii safarka ku wehliyey in ay dardar geliyaan habsami u socodka iskuulkaan, iskuulkana wuxu ku tilmaamay in uu yahay iskuul qaab casri ah loo dhisay, loona baahanyahay in carruurta wax lagu baro.
Maxamed Xasan Cabdiraxmaan (Bakool)
