Maamulka Gobalka Banaadir ayaa dadaalkii ugu Badnaa ku bixinaya Dhismaha iyo Dayactirka Wadooyinka magaalada Muqdisho ee Caasimadda Soomaaliya.
Agaasimaha Howlaha Guud ee Maamulka Gobalka Banaadir Cabdifitaax Cumar Xalane ayaa Warbaahinta u sheegay in iyadoo la fulinayo amarka Duqa Muqdisho ee ahaa in laga shaqeeyo Billicda iyo Nadaafada Caasimadda in la Laami la saaray Wadada Ceelgaabta ee dhexmarta degmada Xamar Jajab.
Gudomiyaha Gobolka Banaadir ahna Duqa Caasimada Muqdisho injineer Cabdiraxmaan Cumar Cusmaan(Yariisow) ayaa xariga ka jaray todobaadkaan maktabad ay caruurta wax ku bartaan oo laga hirgaliyay Degmada Shibis ee Gobolka Banaadir.
Duqa Muqdisho ayaa sheegay in Maktabadaan ay qayb muhiim ah ka qaadaneyso Waxbarashada Ubadka Soo koraya.
Duqa Muqdisho ayaa Todobaadkan Shirar looga hadlayay Nadaafadda Caasimadda iyo Horumarinta Barnaamijka Isxilqaan la yeeshay qaar ka mid ah Bulshooyinka degmooyinka Wadajir iyo Waabari.
Mudane Injineer Yariisow ayaa Bulshada kula dar daarmay inay ka shaqeeyaan Horumarinta Nadaafada, iyadoo uu sheegay in loo baahanyahay in qof kasta si isxilqaan ah uu kaga shaqeeyo horumarinta Magaalada.
Sidoo kale Maamulada degmooyinka Gobalka iyo Shacabka Muqdisho ayaa wali ku hoalan ka qayb qaadashada ololaha Isxilqaan ee dib loogu howlgalinayo xarumaha danta guud ee ku yaala Muqdisho sida Tiyaatarka Qaranka, Maktabada iyo Madxafka Qaranka.
Bulshada Degmada Waaberi ayaa si aad ah ugu farxay una soo dhoweeyey in Suuqii Cali Boolaay ee degmadaasi dib loo soo celiyo, Iyadoo Guddoomiyaha gobalka uu balan qaaday in si deg deg ah looga shaqaynayo in dib loo soo celiyo shuuqaas oo haatan shiyaad gaar ah ay dhisteen.
Maamulka Gobolka Banaadir ayaa Todobaadkaan waxa uu dhagax dhigay xarunta sheybaarka dhismaha oo laga hirgalin doono degmada Wadajir iyadoo xaruntaasi loo dhisi doono si casri ah.
Gudoomiyaha gobalka ayaa sheegay in Dhismayaasha magaalada Muqdisho loo baahanyahay inay la tartamaan Dhismayaasha Aduunka, sidaasi darteedka loo baahanyahay in la ogaado dhismaaya Caasimadda iyo qalabka lagu dhisayo
Duqa Muqdisho ahna Guddoomiyaha Gobolka Banaadir Mudane Cabdiraxman Cumar Cusmaan (Eng.Yarisow) ayaa soo saaray Wareegto ku aaddan Xaruntii Ciidamada Badda ee degmada C/Casiis iyo Gurigii Taliyaha Ciidamada Badda
Duqa Muqdisho ayaa Markii uu arkay Dastuurka JFS, Shariciga Maamulka Gobolada & Degmooyinka, Sharciga Maamulka Dhulka iyo Dhismaha G/Banaadir, Isla markaaba uu hubsaday inay lagama maarmaan ay tahay in Dib u hagaajin lagu sameeyo Qorshaha Guud (Master Plan) ee caasimadda, arkayna baahida deg-dega ah ee loo qabo in safaaradaha loo asteeyo goob ku habboon.
Waxuu soo saaray Xeerkan:
Waxaa cid allaale iyo ciddii ay khuseyso lagu wargelinayaa in Xaruntii Ciidamada Badda iyo Gurigii Taliyaha Ciidamada Badda iyo dhulka dhanka danbe uga beegan illaa Xeebta Badda loo asteeyey goob ama deegaan diblomaasi ah, dhulkaas oo ahaa Dhul Dowladeed oo Dan Guud loogu talo galay.
Qorshahan ayaa ujeedadiisu tahay in Safaaradaha iyo Hay’adaha Caalamiga ee dalka ka howlgala loo helo goobo ku habboon iyo in dib loo soo celiyo bilicdii Caasimada Muqdisho oo ah xarunta ay diblomaasiyiinta uga howlgalaan Dalka.
Duqa Muqdisho ahna Guddoomiyaha Gobolka Banaadir Mudane Cabdirixmaan Cumar Cusmaan (Eng.Yarisow) ayaa daah furay Wadatashiga Qorshaha horumarinta Qaranka ee sagaalaad oo lagu qabtay Xarunta D/Hoose ee Muqdisho, si maamulka Gobolka Banaadir ugu darsardo wixii talo iyo tusaale ah.
Guddoomiye Eng. Yarisow ayaa sheegaay in maamulka Gobolka Banaadir uu ahmiyad gaar ah siinayo qorshaha horumarinta Qaranka, bacdamaa bulshada Caasimaddu ay waligood u taagnaayeen midniada, wadajirka iyo horumarka ummadda Soomaaliyeed.
Duqa Muqdisho ayaa balan-qaaday ka maamul ahaan in kaalintooda ay ka qaadanayaan sidii uu qorshahani u noqon lahaa mid taabagal ah, kuna dhisan aragtida iyo baahida bulshada Soomaaliyeed.
Kulan looga hadlayay sidii xal waara loogu heli lahaa Gaadiidka Xamuulka ka soo qaada Dekada Muqdisho, kuwaas oo mashquul badan ku haaya Wadooyinka Caasimada Qaarkood, ayaa todobaadkaan ka dhacay Dekada Muqdisho.
Taliyaha Ciidanka Booliska Gen. Bashiir Cabdi Maxamed ayaa sheegay kulanka ka dib in go’aan lagu gaaray in Gawaarida xamuulka ah ay shaqayaan habeenkii oo kaliya.
Gudoomiyaha Gobalka Banaadir Mudane Yariisow ayaa sheegay in Dekada Muqdisho ay shaqaynayso Habeen iyo Maalin laakiin maamulka Gobalka uu dadaal badan ku bixinayo in xal waara loo helo, Gawaariada Xamuulka ah ee Mashquulka badan ku haaya wadooyinka qaar.
Xafiiska Warfaafinta Maamulka Gobalka Banaadir
