Madaxweyne ku-xigeenka dowlad Goboleedka Puntland Mudane Axmed Cilmi Cismaan Karaash ayaa ka qayb-galay munaasabad ballaaran oo ay ku qalinjebinayeen 202 arday oo bartay kuliyado kala duwan, isla markaana ka qalinjabiyay Jaamacadda PSU faraceeda Garoowe.
Related posts
Munaasabadda qalinajebinta waxaa Madaxweyne Ku-xigeenka Puntland ku wehlinayey Guddoomiyaha Baarlamaanka Puntland Cabdixakiin Maxamed Axmed Guddoomiyaha gobolka Nugaal Cabdisalaan Xasan Xirsi (Gujir), Duqa degmada Garoowe Axmed Siciid Muuse, mas’uuliyiin ka socdey Wasaaradda Waxbarashada Puntland, Maamulka Jaamacadda PSU, Waalidiin, Arday iyo Marti sharaf kale.
Madaxweyne ku-xigeenka Puntland Mudane Axmed Cilmi Cismaan oo munaasabadda soo xiray ayaa ugu horayn hambalyo u diray maamulka Jaamacadda iyo ardayda qalinjabinaysa oo ah dufcaddii 12-aad ee Jaamacadda ka baxda, waxaana uu tilmaamay inuu aad ugu faraxsan yahay ka soo qayb-galka xafladda.
Mudane Axmed Cilmi Cismaan ayaa ardayda ku dhiirigeliyey inay waddankooda aaminaan, ka shaqaystaan, dadkooda ugu faa’iideeyaan aqoonta ay barteen, shacabka reer Puntland ayuu ugu baaqay inay xoogga saaraan aqoonta qaybaheeda kala duwan, gaar ahaan midda sare, waxaana uu caddeeyay in dawladda Puntland ay ka go’an tahay sidii guud ahaan waxbarashada loo horumarin lahaa.
Ugu dambayn, Madaxweyne Ku-xigeenka dowlad Goboleedka Puntland Mudane Axmed Cilmi Cismaan ayaa shahaadooyin iyo abaalmarino guddoonsiiyey qaar kamida ardaydii qalin-jebisey iyo shakhsiyaad kale oo maamulka Jaamacaddu u gartay inay mudanyihiin, waxaana munaasabaddu ay ku soo idlaatay jawi farxadeed oo laga dheehanayay dadweynihii boqolaalka ahaa ee goobta joogay, kuwaas oo u hambalyaynayay ardayda qalinjabisay.
-DHAMMAAD-
ย 
