Wakiilka gaarka ah ee Midowga Afrika u qaabilsan Soomaaliya Francisco Madeira, ayaa si xooggan u cambaareeyay weerarkii shalay gelinkii dambe kooxda argagixisada Al-Shabaab ka geysteen Hotel ku yaalo magaalada Muqdisho,halkaasi oo toboneeyo qof oo shacab ah waxbana galabn lagu dilay kuwo kalena lagu dhaawacay.
Ambassador Francisco Madeira,ayaa tacsi u diray qoysaska dhibanayaasha ay waxyeelada ka soo gaartay weerarka naxariis darada ah,isagoona dadka dhaawaca ah u rajeeyay iney si dhaqsi ah u bogsadaan.
Weerarkan ayuu ku micneeyay Wakiilka gaarka ah ee Midowga Afrika u qaabilsan Soomaaliya mid la doonayo in dib loogu dhigo horumarka iyo dib u dhiska dalka,wuxuuna hoosta ka xariiqay inuu sii xoojinayo guulaha laga gaaray nabada iyo xasiloonida dalka.
“Soomaaliya waxay horumar weyn ka sameysay sidii ay u qabsan lahayd dhul baaxad weyn,waxayna argagixisada ka saartay meelo badan oo dalka ka mid ah. Ciidamada AMISOM waxay sii wadi doonaan inay taageeraan Ciidamada Ammaanka ee Soomaaliya iyaga oo sii amba-qaadaya xoreynta deegaanada ku harsan gacanta kooxaha nabad diidka ah,” ayuu yiri Amb: Francisco Madeira.
Kooxda argagixisada Al-Shabaab ayaa si micno daro ah ku daadiya dhiiga Shacabka Soomaaliyeed ee aan waxba galabsan iyo shaqsiyaadka wax galka u ah Bulshada.
