Maamulka Gobolka Banaadir ayaa casha sharaf u sameeyay Haweenkii ka qeyb galayay shirkii 3aad ee Haweenka ku jira Barlamanka labada aqal ee dowladda, Golaah Aqalka Sare iyo Golaha shacabka iyo Xildhibaannada maamul Goboledyada oo labadii cisho ee la soo dhaafay ka socday Magaalada Muqdisho.
Caha sharaftaan loo sameeyay haweenka waxaa goob joog ka ahaa Gudoomiye ku-xigeenka arrimaha Bulshada iyo Wacyi gelinta Maamulka Gobolka Banaadir Marwo Basma Caamir Axmed (Jakeeti) iyo Gudoomiyaha Haweenka Gobolka Banaadir Jawahir Maxamuud Jaamac (Jawhir Baadqab).
Gudoomiye ku-xigeenka arrimaha Bulshada ee Gobolka Banaadir Basma Caamir Jakeeti ayaa soo dhaweyn kaddib u mahadcelisay haweenka ku jira Baarlamaanka labada Aqal iyo haweenka kale ee ka tirsan Xildhibaanada Dowlad Goboleedyada inay muujiyaan doorka ay ku leeyihiin hannaanka doorashooyinka dalka.
Qaar ka mid ah Haweenka Xildhibaannada ee labada Aqal oo dhankooda ka mahadceliyay munaasadda casho sharafta ah ayaa sheegay inay dhankooda diyaar u yihiin inay ka soo dhalaalaan kaalinta haweenka ee horumarka dalka.
