Howlgal qorsheysan oo caawa ay ka sameeyeen Kumaandooska Xoogga dalka tuulooyinka Buulo Urunji, Malable, Tawakal, oo hoostaga degaanka Janaale ee Gobolka Shabeelaha Hoose ayay ku dileen 18 isugu jira horjoogeyaal iyo maleeshiyaad ka tirsan argagixisada Al-Shabaab.
Horjoogayaasha iyo maleeshiyaadka howlgalka lagu dilay ayaa ku dhuumaaleeysanayay dhulka hawdka ah ee ku yaala tuulooyinka kor ku xusan.
Taliyaha Ciidanka Dhulka Xoogga Dalka Sareeyo Guuto Cabdixamiid Maxamed Dirir ayaa Idaacadda Ciidamada Qalabka sida u sheegay howlgalka inuu yimid kadib markii dadka degaanka ay ku soo wargaliyeen maleeshiyaadka dhuumaaleysanayay islamarkaana ay qaadeen howlgal qorsheysan oo ay fuliyeen Kumaandooska Xoogga dalka ee Gor-gor iyo Danab.
Jeneraal Cabdixamiid ayaa tilmaamay horjoogayaasha ladilay oo gaaraya sadax ay magacyadooda dib ka soo sheegi doonaan balse mid ka mid oo lagu magacaabo Muxudiin Sheekh Cabdi (Al-Anzaari) uu dhagarqabayaasha u qaabilsanaa inta u dhexeyso Janaale iyo Awdheegle.
“Sidii Janaale aan u xoreynay waxaan wada shaqeeyn dhow la yeelanay dadka deegaanka, kuwaasi oo noo soo gudbiya xogta cadawga, maadaamaa dhibaato badan argagixisadu ay ku hayeen muddadii ay joogeen degaanka cabsidii Al-Shabaab waxaan ugu badalnay soo dhaweeyn iyo naxariis walaaltinimo.” Ayuu yiri Taliyaha Ciidanka Dhulka Xoogga Dalka.
