Xubnaha dimoqraadiga ee ku jira golaha wakiilada Mareykanka ayaa bilaabay in ay maamus ka xayuubin ku sameeyaan madaxweyne Trump, isagoo lagu eedeeyay in uu ka dambeeyay rabshadihii ka dhacay aqalka Capitol Hill ee baarlamaanka ku shiraan.
Haddii talaabadan dhaqan gasho madaxweyne Trump wuxuu noqon doonaa madaxweynihii labo jeer maamulka ay ka qaadeen golaha wakiilada.
Kumanan kamid ah taageeriyaasha Trump ayaa gudaha u galay xarunta Capitol Hill xilligaas ay ka socotay kulan wadajir ah oo labada aqal ku ansixinayeen guusha madaxweynaha la doortay ee Joe Biden.
Rabshadahaas ka dib, afhayeenka aqalka wakiilada Mareykanka, Nancy Pelosi ayaa sheegtay in dhammaan xildhibaanada xisbigeeda iyo qaar kamid ah mudanayaasha xisbiga jamhuuriga qabaan in Trump lagu sii aamini karin xafiiska inta ka harsan muddo xileedkiisa oo ku eg 20 bishan Janaayo.
Kulanka maanta golaha yeesheen waxay soo saarayaan wax ka bedelka qodobka 25 aad ee dastuurka kaas oo sheegaya in madaxweyne ku xigeenka uu xilka kala wareego madaxweynaha haddii uu diidana golaha waxay ka doodi doonaan maamus ka xayuubinta Arbacada soo aadan.
Afhayeenka congresska ayaa sheegtay in kulanka uu ka soo qeybgali doono madaxweyne ku xigeenka Mike Pence.
Dadka ka faalooda siyaasadda Mareykanka waxay leeyihiin, in madaxweyne sagaal cisho uga harsan tahay muddo xileedkiisa maamuska laga xayuubo ma ahan wax sidaas u weyn, laakiin haddii arrintan dhaqan gasho madaxweyne Trump ayay ka hor istaagi doontaa in uu isu soo sharaxo doorashada sanadka 2024.
