Golaha Wasiirada Xukuumadda Federaalka Soomaaliya, ayaa maanta ansaxiyey Siyaasadda Ganacsiga Qaranka, Siyaasadda Horumarinta Warshadaha Soomaaliyeed iyo siyaasadda Shirkadaha yar-yar iyo Kuwa dhexe oo muddooyinkii dambe ay ka shaqeynaysay sidoo kale na soo diyaarisay Wasaaradda Ganacsiga iyo Warshadaha, waxaana kulanka shir guddoominayay Ra’iisul Wasaare ku-xigeenka Dalka Mudane Mahdi Maxamed Guuleed (Khadar).
Saddexdan siyaasaddood, ayaa ahmiyad weyn u leh dhaqaalaha wadanka, shaqo-abuurka, horumarka iyo fududeynta ganacsiga, kor-u-qaadista wax-soo-saarka Warshadeynta, cayimidda aagga Warshadaha ee dalka, wax-ka-qabashada caqabadaha hortaagan horumarka Warshadaha, taageerista ganacsiyada yar-yar iyo kuwa dhaxe, dhiiri-gelinta maal-gashadeyaasha, tiknoolajiyadda, dhiiri-gelinta ganacsiga haweenka iyo hal-abuurka ganacsiga dhallinyarada, horumarinta dhoofka badeecadaha dalka, isku-dheeli-tirka ganacsiga iyo weli ba xoojinta heshiisyada ganacsiga ee gobalka iyo kuwa caalamka ba.
Siyaasaddahan, ayaa ay dedaal xoog ah ku bixiyeen madaxda Wasaaradda Ganacsiga iyo Warshadaha oo uu ugu horreeyo Wasiirka Wasaaradda Mudane Khaliif Cabdi Cumar, Wasiir-dawlaha, Wasiir ku xigeenka, Agaasimaha Guud, Agaasime Waaxeedyada iyo weli sidoo kale la-taliyeyaasha Wasaaradda, waxaana ay soo mareen marxalado kala duwan, iyada oo la-tashiyo laga la soo sameeyey dhammaan hay’adaha dawladda ee ay khusayso, dawladaha xubnaha ka ah dawladda Federaalka ee Soomaaliya iyo ganacsatada iyo warshadlayda dalka, waxaana ay noqonaysaa muddo 30sanno ka dib markii ugu horreysay ee Soomaaliya yeelanayso siyaasado noocan oo kale ah.
Dhinaca kale Golaha Wasiirrada Xukuumadda Federaalka Soomaaliya ayaa ansixiyay Hindise Sharciyeedka Sharciga Howl-gabka iyo Liil-tirka Shaqaalaha Rayidka ee Dawladda oo ay horgeysay Wasaaradda Shaqada iyo Arrimaha Bulshada.
Yoolka guud ee Hindise Sharciyeedka Sharciga Howl-gabka iyo Liil-tirka Shaqaalaha Rayidka Dowladda waa in la helo, la xaqiijiyo lana siiyo shaqaalaha rayidka Dawladda daryeel hawlgab iyo liiltir sugan oo ku habboon shaqaala rayidka kaasoo ah mid la joogteyn karo.
Wasiirka Shaqada iyo Arrimaha Bulshada Xukuumadda Federaalka Soomaaliya, Mudane Duraan Axmed Faarax wuxuu sheegay meelmarinta sharcigan inay muhiimad u leedahay Shaqaalaha Rayidka Dawladda.
“Waa dhacdo taariikhi ah ansixinta hindisahan, waxaan boggaadin oo aan u mahadcelinayaa howlwadeennada waqtiga iyo juhdiga galiyay iyo Golaha Wasiirrada oo dhaqangeliyay.” ayuu ku daray Wasiir Duraan Faarax.
