Ciidanka xoogga dalka oo kaashanayo kuwad daraawiishta Galmudug ayaa Howl-gal balaaran ka wada deegaanno dhowr ah oo dhaca koofurta Gobolka Mudug oo ay argagixisadu Al-shabaab ku dhibaateeyaan dadka shacabka.
Wasaaradda amniga gudaha Galmudug ayaa qoraal ay soo saartay ku sheegtay inay ciidamada qaranka ay ku sii siqayaan magaalada Camaara iyagoo burburiyey difaacyo kooxda argagixisada ah ku lahaayeen hareeraha wadooyinka deegaannada Camaara iyo Bacaadweyn ee Gobolka Mudug.
Sidoo kale Wasaaradda amniga Gudaha Galmudug ayaa sheegtay in hawl-galkaan ay ciidamada qaranka iyo kuwa Galmudug ay ku baacsanayaan kooxda khawaariijta Al-shabaab uu sii socon doona illaa laga xoraynayo deegaannada Fara ku tiriska ah ee gacantood ku haray.
Ciidanka xoogga dalka ayaa labo jibaaray howl-galada ka dhanka ah Argagixisada looga sifeynayo guud ahaan Gobolada dalka waxaana kuwii ugu dambeeyay oo ay ka sameeyeen Gobolka Mudug ay Jab xooggan ku gaarsiiyeen argagixisada sidoo kale waxa ay ku dileen horjoogayaal iyo maleeshiyaad farabadan oo ka tirsan waxaan ay kala wareegeen deegaanno badan iyagoo kasoo furtay Hub.
