Munaasabadan oo u jeedkeedu ahaa qaabka gabdhaha loogu dhiirigelin karo inay bartaan, heer fiicana ka gaaraan barashada farsamada gacanta qeybaheeda kala duwan sida korontada, makaanikada, dhismaha iyo soolarka ayaa waxaa goob joog ka ahaa maamulka xarunta farsamada gacanta Xayle Bariise, Masuuliyiin ka kala socotay qaar ka mida Wasaaradaha Xukuumadda, Maamulka gobolka Banaadir iyo marti sharaf kale.
Maamulaha Xaruunta horumarinta Farsamada gacanta ee Xayle Bariise Cabdiraxiin Xayle Bariise ayaa xusay inuu hadafkoodu yahay inay soo saaran gabdho aqoon buuxda u leh qeybaha kala duwan ee farsamada gacanta, wuxuuna dhinaca kale ballanqaaday inay labaatan gabdhood siin doonaan waxbrasho lacag la’aan ah.
Injineerada kala ah Sowdo Xuseen Suudi, Shukri Cabduqaadir Salaad iyo Caa’isha Xasan oo ka mid ah gabdha ka aflaxay xaruunta Xayle Bariise hadana ku shaqeytsa xirfadaha ay barteen ayaa gabdhaha kula taliyay inay bartaan farsamada gacanta oo ay tilmaameen inay iyagu ku faa’iideen.
Agaasimaha Waaxda Farsamada Gacanta ee Gobolka Banaadir Cabdicasiis Muqtaar Cali iyo Agaasimaha Waaxda canshuuraha ee Gobolka Banaadir Ayaan Cabdi Maxamuud ayaa xusay inay ka shaqeyn doonaan sidii ay u garab istaagi lahaayeyn gabdhaha ka guul gaara barashada farsamada gacanta.
Xarunta horumarinta Farsamada gacanta ee Xayle Bariise ayaa sanad walba soo saarta kaadiriin farsamo oo isugu jira gabdho iyo wiilaal, kuwaas oo ku shaqeyta xirfadaha ay barteyn oo kala ah korontada, makaanikada, dhismaha, soolarka iyo qeybaha kala duwan ee farsamada gacanta la xiriirto.
