Masuuliyiinta Xaruunta Farsamada gacanta ee Xayle Bariise ayaa heshiis iskaashi oo ku saabsan Tababarida ardayda Kuliyadda Injineerinka la saxiixday Jaamacadda SIU.
Heshiiksa iskaashi ee maanta dhexmaray masuuliyiinta Xaruunta horumarinta Farsamada gacanta ee Xayle Bariise iyo Jaamacada SIU ayaa saldhig u noqon doona Tababarida ardyda kuliyadda Injineerinka si loo dhiso tayo ahaan iyo xirfad ahaan, islamarkaana ay muddo sanad ah fursad u helaan inay baraatiko ku qaataan Xaruunta Xayle Bariise, taas oo muhiim u ah aqoontooda iyo cilmiga Injineerinka oo ay hada qaab Qoraal ahaan u bartaan.
Munaasabada oo ay ka qeeyb galeen Mas’uuliyiin ka socday Wasaaradda Waxbarashada, Maamulka Gobolka Banaadir, rugta ganacsiga iyo aqoonyahano ayaa waxay ka hadleenmuhiimada heshiiskan iyo sida ay lagama maarmaan u tahay In la horumariyo xirfadaha farsamada gacanta.
Ku simaha Gudoomiyaha Jaamacadda SIU Maxamed Yuusuf Sheekh Cumar, ayaa xusay in heshiiskan uu muhiimad weyn u leeyahay ardayda islamarkaana uu horseedi doono sidii ay u horumarin lahaayeyn xirfadooda taas oo u sahli doonta inay si fudud ku helaan shaqooyin.
Maamulaha Xaruunta horumarinta Farsamada gacanta ee Xayle Bariise Cabdiraxiin Xayle Bariise- ayaa xusay inay ku faraxsanyihiin in xirfada farsamada gacanta loo arko wax muhiim ah oo lagu horumarin karo dalka, wuxuuna dhinaca kale ballanqaaday inay ka shaqeyn doonaan sidii ay ardayda u heli lahaayeyn aqoon tayo leh oo ay ku faaiidi doonaan.
Agaasimaha Tacliinta sare ee Wasaaradda Waxbarashada Soomaaliya Ismaaciil Yuusuf Cismaan Ayaa dhalinyarada kula taliyay inay ka faaiideystaan fursadan oo uu sheegay inay dalka wax badan kusoo kurdhin doonto.
Saxiixa heshiiska kadib Masuuliyiinta kala duwan ee ka qeyb galay munaasabada ayaa kormeeray qeybaha Kala duwan ee xaruunta farsamada gacanta ee Xayle Bariise iyagoo u kuurgalay qaabka ay waxbarashadu u socoto.
