Deeq Cabdi maciin oo magaciisa Af-graashada kooxda Al-Shabaab uu yahay “Shiino” ayaa isku soo dhiibay Ciidamada Daraawiishta Galmudug ee ku sugnaa aagaga dagaalka koonfurta gobolka Mudug.
Nnkan ayaa sheegay in maleeshiyaadka argagixisada Al-Shabaab uu u qaabilsanaa sameynta aaladaha qarxa sida Miinooyinka.
Deeq Cabdi Maciin oo muddo labo ilaa iyo saddex sano ka mid ahaa nabad-diidka Al-Shabaab ayaa tilmaamay inuu qaatay mudadii uu kooxdaas ka tirsanaa tababaro ku saabsan sida miinooyinka dhulka loogu aaso looguna dhagro shacabka Soomaaliyeed, sidoo kale, wuxuu qiray in muddo kooban uu ka mid ahaa jabhadaha dagaalka ee maleeshiyada.
“ Waxaa igu dhaliyay baahi badan oo aan arkay, adigoo reerkaadii, ubadkaadii iyo dadkaada aadan ka war qabin oo afar iyo labaatan saac duurka ku jira iyo inaadan ku dhiiran Karin oo aadan dhihi Karin aniga waxaa rabaa inaan reerkeyga soo eego oo waqti la soo qaato,” ayuu wareysigiisa ku sheegay Deeq Cabdi Maciin Shiino.
Isagoo hadalkiisa sii wato ayuu sheegay in falalka guracan ee kooxda Al-Shabaab aanay diinta islaamka sal iyo raad toona ku lahayn, islamarkaana ay si cad u baneysteen dhiigga Shacabka Soomaaliyeed ee muslimiinta ah.
Bilooyinkii la soo dhaafay ayaa waxaa aad isu soo tarayay horjoogayaasha iyo maleeshiyada Al-Shabaab ka soo baxsanaya ee isku soo dhiibaya ciidamada Dowladda.
Ugu dambeyntii, Sarkaalkan isa soo dhiibay oo ku dhashay gobolka Mudug ayaa ugu baaqay maleeshiyada wali baaqiga ku sii ah Al-Shabaab in ay ka soo baxaan.
