Ku-simaha Madaxweynaha ahna Guddoomiyaha Baarlamanka Koonfur Galbeed Soomaaliya ayaa tababar u soo xirey cutubyo ka tirsan qeybta 60aad ee Ciidanka Xoogga dalka Soomaaliyeed, kuwaasi oo ku jiray xerada tababarada Dowlada UK ee Magaalada Baydhabo, waxaana tababarka loo soo xiray ururka 47-aad Qeybta 60aad ee Ciidamada Xoogga dalka.
Munaasanbada xiritaanka tababarka ayaa waxaa ka qeyb galay mas’uuliyiin uu ugu horeeyo Guddoomiyaha Baarlamaanka Koonfur Galbeed Soomaaliya Dr Cali Siciid Faqi, Wasiirka Amniga Koonfur Galbeed Isxaaq Cali Subug, Taliyaha qeybta 60-aad ee Ciidanka Xoogga dalka Janaraal Maxamed Sheekh Cabdullaahi (Ciirow) Agaasimaha Guud ee Madaxtooyada Koonfur Galbeed Cabdullaahi Cali Watiin, Taliyaha howlgelinta ciidamada qeybta 60-aad Gaashanle Dhexe Xasan Ibraahim Yarow, Taliyaha tababarada qeybta Gaashaanle Cali Nuur Maxamed Idiris Cali, Taliyaha guudatada 8-aad qeybta 60-aad Gaashaanle Maxamed Nuur Maddheere, iyo Mas’uuliyiin kale.
Inta ay munaasabadda socotay ayaa waxay ciidamadu goobta ku soo bandhigeen gaado ka ciyaar iyo dhoololtus Militeri, waxaana qaarkood maanta la guddoonsiiyey bilado ay ku kala guuleysteen dhinacyada shiishka, Aqlaaqda, miino aasidda, miino baaridda iyo habka loo tuuro qoryaha hoobiyaha.
Taliyaha qeybta 60-aad ee Ciidanka Xoogga dalka Janaraal Maxamed Sheekh Cabdullahi (Ciirow) oo ka hadlay xiritaanka munaasabadda ayaa ku dheeraadey dardaaran dheer oo uu u jeediyey ciidamada tababarka loo soo xiray, isagoo ku dhiirageliyey iney u istaagaan Difaaca dadka, dalka iyo cirib tirka kooxaha Nabaddiidka ee baneystey dhiiga Wallaalahooda.
Dr Cali Siciid Faqi ku-simaha Madaxweynaha Koonfur Galbeed ahna Guddoomiyaha Baarlamaanka Koonfur Galbeed Soomaaliya ayaa mahadcelin balaaran u jeediyey saraakiisha ciidamada UK ee had iyo jeer tababarka ciidamada qeybta 60-aad iyo macalimiinta dugsiga tababarka ee magaalada Baydhabo.
Dhowrkii bilood ee la soo dhaafey ururkaan 47-aad ee qeybta 60-aad waxaa u socdey tababar ciidan oo dhan walba leh, waxaana ciidamada loo tababarey dhinacyada Shiishka, Miino baarista, Miino’aasidda, hagida iyo tuuridda hoobiyaha iyo sidoo kale casharada kale ee ciidanka la baro.
