Waxaa aad u wanaagsan xaalada caafimaad ee afhayeenka xukuumada Soomaaliya Maxamed Ibraahim Macalimuu oo shalay ku dhaawacmay qarax ay argagixisada Al-Shabaab u soo maleegeen, kaas oo ka dhacay agagaarka isgoyska Dabka ee magaalada Muqdisho.
Agaasimaha warfaafinta ee xafiiska ra’iisul wasaaraha dalka Liibaan Cabdi Cali ayaa Radio Muqdisho u sheegay in dhaawaca Macalumuu uu yahay mid ka fudud sidii ay wax u dhaceen, isla markaana uu jiro jab ka soo gaaray lug iyo dhaawacyo kale oo fudud, sida uu sheegay Agaasime Libaaan.
Dhaawaca Afhayenka ayaa loo qaadayaa caafimaad dibada ah, gaar ahaan dalka Turkiga, siday ay noo sheegeen xubno ka tirsan xafiiska Ra’iisul wasaaraha.
Ra’iisul Wasaaraha XFS Maxamed Xuseen Rooble ayaa xalay afhayeenka ku booqday isbitaalka, isagoo u kuur-galay xaaladiisa caafimaad, sidoo kalena warbixin ka dhageystay dhakhaatiirta dabiibeysa dhaawaca Afhayeenka.
Isbitaalka Digfeer ee caasimada Muqdisho ayaa lagu dabiibayaa Macalimuu, qaraxaan ayaa ahaa mid kaligiis loo soo qorsheeyey, waxuu ahaa kii shanaad oo Macalimuu uu la kulmay shantii sano ee u dambeysay.
Qaarkood Alle ayaa ka badbaadiyey, halka qaarna ay ka soo gaareen dhaawacyo isugu jiray ku fudud iyo kuwo culus, qaraxii shalay waxaa ku dhintay qofkii nafiisa haligay oo kaliya.
