Wasiiro iyo Xildhibaano ayaa ka qeyb galay xaflad lagu maamuusayey Sanadguurada 45-aad ee aasaaska Isbitaalka Hooyada iyo Dhallaanka ee Banaadir iyo Soo bandhigidda waxqbadka Sedeexdii sano ee ugu dambeysay
Heeso, gabayo iyo warbixino kala duwan oo ka tarjumaya wax qabadkii mugga lahaa oo ay ku talaabsadeyn Maamulka iyo howlwadeenada Isbitaalka Hooyada iyo Dhallaanka ee Banaadir ayaa lagu soo bandhigay Munaasabadda Sanadguurada 45-aad ee aasaaska Isbitaal Banaadir iyo Soo bandhigidda waxqbadka Sedeexdii sano ee ugu dambeysay.
Munaasabadda oo ay goob joog ahaayeyn wasiiro, Xildhibaano ,Madax ka socotay Gobolka Banaadir iyo marti sharaf kala duwan ayeey ugu horeyn Agaasimaha Isbitaal Banaadir Fartuun Shariif Maxamed waxey ku bidhaamisay In seddexdii sanno ee lasoo dhaafay ay adeeg caafimaada oo lacag la’aana u sameeyeyn ku dhawaad Laba Boqol oo kun oo bukaan oo ka kala yimid Gobolada dalka oo dhan, waxeyna dhinaca kale ku baaqday in dadka Soomaaliyeed ay sameeyaan isku-tashi dhaqaale si loo dardargeliyo howlaha kala duwan ee Isbitaalka oo ay kusoo hirtaan bulshada kuwooda ugu nugul.
Agaasimihii ugu horeeyay ee Isbitaal Banaadir Cabdicasiis Xaaji Gacal Ayaa dhankiisa tilmaamay in Isbtaal Banaadir oo markii ugu horeysay la aasaasay sanadkii 1977 uu weligaa ahaa mid shaqooyinkiisa la mahdiyo maadaama uu ahaa Isbitaalka kaliya ee xilligaas lagu dabiibi jiray Hooyadda iyo Dhallaanka.
Senator Zamzam Daahir Maxamuud iyo Gudoomiye ku Xigeenka Arrimaha Bulshada ee Gobolka Banaadir Basmo Caamir Jakeeti oo munaasabadda ka hadlay ayaa maamulka iyo shaqlaha Isbitaal Banaadir ku amaanay shaqada hufan oo ay dalka u hayaan.
Wasiir ku xigeenka Wasaaradda Warfaafinta Dhaqanka iyo Dalxiiska Soomaaliya Mudane Cabdirixmaan Yuusuf Sheekh Al-Cadaala ayaa sheegay In marxalad adag oo lagu dhiiraday laguna guuleysatay ay aheyd talaabadii dib loogu howlgaliyay Isbitaal Banaadir oo shaqo adag bulshada u haya , wuxuuna dhinaca kale xusay inay ka xukuumad ahaan ku dadaali doonaan sidii loo garab istaagi lahaa bahda caafimaadka oo uu sheegay inay bogaadin mudanyihiin.
Wasiirka Caafimaadka iyo Daryeelka Bulshada Soomaaliya Dr Fowsiyo Abiikar Nuur oo munasabada soo xirtay ayaa Dadka Soomaaliyeed ayaa bogaadisay Maamulka iyo Shaqaalaha Isbitaal Banaadir oo ay sheegtay in iyaga oo duruuf adag ku shaqeenaya ay ku dadaaleyn sidii ay caafimaad wanaagsan u heli lahaayeyn Hooyooyinka iyo Ubadka Soomaaliyeed.
Dr Fowsiyo Abiikar Nuur Wasiirka Caafimaadka XFS ayaa dhinaca kale dadka Soomaaliyeed ku buurisay inay isku tashi sameeyaan si ay uga dhabeeyaan hadafka bahda Caafimaadka ee ah in la gaaro Yoolka Caafimaadka loo dhanyahay.
Ugu dambeyn waxaa munaasabadda shahaadooyin lagu dhiirigelinayo la gudoonsiiyay qaar kamida maamulka iyo howlwadeenadii muujiyay shaqo wanaaga.
