Tartan cilmiyeedka bisha Ramadaan oo galay sanadkii kow iyo tobnaad oo ay qabaneyso Warbaahinta Qaranka, isla markaana si toos ah looga daawanayo Telefishinka Qaranka, lagana dhageysto Idaacadda Radio Muqdisho habeen waliba ayaa waxaa caawa kulankiisa 23-aad ee wareegga 2aad ku tartamay degmooyinka Gaalkacyo iyo Howlwadaag oo ka kala tirsan Gobollada Mudug iyo Banaadir. waxaana barnaamijka sanadkii 2aad oo xiriir ah taaba-gelineya Bangiga IBS.
Tartameyaasha labada degmo ee Gaalkacyo iyo Howlwadaag ayaa muujiyey tartan aad u adag, isla markaana ahaa mid xiiso gaar ah xambaarsan, iyagoo soo bandhigay aqoon iyo asluub wanaag labada dhinac inta uu tartanka socday.
Gaalkacyo
Tartameyaasha Degmada Gaalkacyo ee Gobolka Mudug, waxaa la weydiiyey todobo Su’aal, todobadii su’aal ee la weydiiyay waxa ay ka jawaabeen Afar su’aal, halka ay iska qaldeen Saddex su’aal, Ma jirin wax ka faa’iideysi ah oo ay heleen, sidaas darteed wadarta guud ee dhibcaha tartameyaasha Degmada Gaalkacyo ay heleen waxay noqotay Sideed (8) dhibcood.
Howlwadaag
Tartamayaasha Degmada Howlwadaag ee Gobolka Banaadir waxaa dhankooda la weydiiyay todobo su’aal, waxa ay ka jawaabeen Saddex su’aal, iyagoo iska qalday Afar su’aal, Ma jirin dhankooda iyana wax ka faa’iideysi ah oo ay heleen, sidaasi darteed wadarta guud ee dhibcaha ay heleen tartameyaasha Degmada Howlwadaag waxay noqotay Lix (6) dhibcood.
Hadaba kulankii 23-aad ee tartan Cilmiyeedka bisha Ramadaan ee Warbaahinta Qaranka caawa waxaa wareegga 3aad u soo gudbay tartamayaasha Degmada Gaalkacyo ee Gobolka Mudug, ayadoo gebagebadii ay labada tartame isugu hambalyeeyeen guushaasi.
Habeen dambe haddii uu Alle idmo oo ah habeenka 22-aad ee tartanka, waxaa jiri doonta labo kulan, kulankiisa 24-aad waxaa ku tartami doona degmooyinka Kismaayo iyo Kaxda oo ka kala tirsan Gobollada Jubbada Hoose iyo Banaadir, halka Kulanka 25aad ay fooda is dari doonaan degmooyinka Wadajir iyo Marko oo ka kala tirsan Gobollada Banaadir iyo Shabeelaha Hoose.
Intaas kadib Guddoomiyaha tartan cilmiyeedka Warbaahinta Qaranka Mudane Yaxye Cali Faarax ayaa akhriyay isku aadka wareegga 3aad ee tartanka oo ay u soo gudbeen afar degmo, kuwaasi oo ku cad sida shaxda hoose ku qoran.
Sawir Qaade:- Sakariye Shiddo
