XildhibaanNada Golaha Shacabka iyo xubnaha Golaha Aqalka Sare ayaa maanta oo Sabti ah dhageystay hadal jeedinta musharaxiinta isku diiwaangeliyay tartanka Guddoomiyaha Golaha Shacabka ee Baarlamaanka 11-aad,iyadoo sidoo kale, beri la dhageysan doono khudbadaha musharaxiinta Guddoomiye ku-xigeenNada 1aad iyo 2-aad.
Musharax kasta oo u tartamaya xilka Guddoomiyaha Golaha Shacabka ayaa waxaa la siiyay min 15-daqiiqo oo hadal jeedin ah si uu ugu soo bandhigo sooyaalkiisa, waxqabadkiisa iyo codsiga uu u jeedinayo Xildhibaannada go’aanka ka gaaraya codeyntiisa.
8-musharax ayaa isku diiwaangelisay xilka Guddoomiyaha golaha Shacabka, waxayna kala yihiin
- Xildhibaan Maxamed Mursal Sheekh Cabdiraxmaan
- Xildhibaan Cabdirashiid Maxamed Xidig
- Xildhibaan Cabdullaahi Aadan Axmed Black
- Xildhibaan Aadan Maxamed Nuur Saransoor
- Xildhibaan Xasan Cabdinuur
- Xildhibaan Sadiq Cabdullaahi Cabdi
- Xildhibaan Shariif Maxamed Cabdalla
- Xildhibaan Adan Maxamed Nuur (Aadan Madoobe)
Dhanka kale, Golaha Aqalka sare waxaa ka socday dhageysiga hadal-jeedinta musharaxiinta guddoomiyaha Aqalka sare, guddoomiye ku-xigeen 1-aad iyo 2-aad.
Senatarada u tartamaya guddoomiyaha iyo labadiisa ku-xigeen ayaa waxaa si isku mid ah loo siiyay mid 20-daqiiqo oo uu mid walba ku soo bandhigayo sooyaalkiisa, waxqabadkiisa iyo codsigiisa.
3-Musharax ayaa isku diiwaangelisay xilka Guddoomiyaha Aqalka Sare, 2-musharax Guddoomiye ku-xigeenka koowaad halka 7-musharax ay isku diiwaangelisay Guddoomiye ku-xigeenka labaad ee golaha Aqalka sare.
