Madaxweynaha Mareykanka Joe Biden, ayaa maanta oo Arbaca ah Aqalka Cad ee Mareykanka looga arrimiya ku qaabili doona dhiggiisa Ukraine Volodymyr Zelensky, ka hor inta uusan khudbad u jeedin aqalka Congress-ka Mareykanka.
Afhayeen u hadlay Washington ayaa xaqiijiyay in Madaxweynaha Ukraine uu booqashadii ugu horreysay ku tagaya Mareykanka tan iyo markii uu bilowday dagaalka Ruushka ku qaaday dalkiisa.
Sidokale waxuu sheegay Afhayeenka in booqashada Zelensky ee Washington ay ku timid casuumaad uu ka helay dhigiisa madaxweyne Biden, si uu u xaqiijiyo ballanqaadyadii iyo taageeradii Mareykanka uu u muujiyay Ukraine.
Madaxweyne Zelensky ayaa bartiisa Twitter-ka ku shaaciyay in Safarkiisa Mareykanka uu ku qotoma sidii loo xoojinlahaa awoodda difaaca Ukraine, isaga oo khudbad ka hor jeedin doona Congress-ka.
Booqashada Madaxweyne Volodymyr Zelenskyuu ku tagaya Mareykanka, ayaa ku soo beegmeeysa xilli 300 oo maalmood ay ka soo wareegtay dagaalka Ukraine uu ka qaaday Ruushka.
