Ku Simaha Ra’iisul Ra’iisul Wasaaraha Ahna Ra’iisul Wasaare Ku Xigeenka Xukuumadda Federaalka Soomaaliya Mudane Saalax Axmed Jaamac ayaa maanta kormeer shaqo ku tagay Wasaaradaha Caddaalada, Garsoorka Iyo Arrimaha Dastuurka; Xafiiska Xeer-Ilaaliyaha Guud Ee Qaranka iyo Wasaaradda Qorshaynta, Maalgashiga Iyo Horumarinta Dhaqaalaha.
Ra’iisul Wasaare Ku Xigeenka ayaa mid mid u kormeeray xafiisyada Wasaaradda Cadaaladda isagoo kulamo la yeeshay hogaanka Wasaaradda kana dhagaystay qorshahooda sannadka cusub, dhanka kalena ku bogaadiyey shaqada qiimaha badan ee ay qaranka u hayaan.
Ra’iisul Wasaare Ku Xigeenku wuxuu sidoo kale kormeer ku tagay Xafiiska Xeer Ilaaliyaha Guud Ee Qaranka, isagoo si dhow ugu kuurgalay hawlaha kala duwan ee halkaas ka socda, islamarkaana kulamo gaargaar ah la yeeehay hawladeennada iyo maamulka Xafiiska.
Ra’iisul Wasaare Ku Xigeenka oo weli ku gudajira kormeerkiisa ayaa sidoo kale booqday Wasaaradda Qorshaynta, Maalgashiga Iyo Horumarinta Dhaqaalaha, halkaas oo uu kula kulmay mas’uuliyiinta iyo shaqaalaha Wasaaradda oo uu ka wareystay hawlaha ay umadda u hayaan.
Gabagabadii, Ra’iisul Wasaare Ku Xigeenka Xukuumadda Federaalka Soomaaliya Mudane Saalax Axmed Jaamac ayaa agaasimayaasha wasaaradda kula dardaarmay in ay labo-jibaaraan shaqada qaranka.
