Guddoomiyaha Golaha Shacabka BJFS ahna Ku-simaha Madaxweynaha Jamhuuriyadda Mudane Sheikh Adan Mohamed Nur Madobe ayaa soo xiray shir weynaha Midowga Baangiyadda Soomaaliyeed ee SBF.
Shirka Midowga Baangiyadda Soomaaliyeed oo ay ku mideysan yihiin 13 bangi ayaa inta uu socday waxaa lagu soo bandhigay barnaamijyo ku saabsan horumarinta dhaqaalaha dalka, cilmi baarisyo la xiriira sida ay u shaqeyaan baangiyadda aduunka, kuwa Afrika iyo kuwa Soomaaliya, iyagoo xusay in dowadda ay fududeeyso aqoonsiga dadweynaha si loogu kalsoonaado kobcinta dhaqaalaha.
Guddoomiyaha Golaha Shacabka ahna Ku-simaha Madaxweynaha JFS oo gunnaanadka shirka soo xiray ayaa bangiyada Soomaaliyeed ku ammaanay doorkii horumarineed iyo dib u dhiska dalka ay ka soo qaateen, kuwaas oo ku soo shaqeeyay marxalado adag iyo daruufo kala duman oo dhaqaale. Guddoomiyaha ayaa sidoo kale sheegay in maanta la helay adeegyo bangi oo waxbadan u taray dowladda iyo shacabka Soomaaliyeed. Sidoo kale Guddoomiye Sheekh Aadan Madoobe ayaa sheegay in dowladda lacag ay yeelato, baangiyada iyo ganacsatada Soomaaliyeedna ay gacan ku siiyaan si aan aduunka ula macaamiilno.
