Shamso Maxamed Ceel Jooge, waxay dhibane u tahay Kooxda Khaawrijta Al-shabaab, waxayna ka dileen Aabaheed, Walaalkeed iyo Adeerkeed, intaas ugama sii harin ee waxayna dul dhigeen lacago baad ah oo gaaraya 7-kun oo dollarka Mareynkanka.
Shamso hadda waxay qeyb ka tahay ciidamada dib-u-xoreynta galbeedka Shabeellaha dhexe, halkaas oo ay argagixisadu ku wajaheyso ciqaab adag oo ka dhalatay caburin iyo gumaad joogta ah oo ay shacabka xoola dhaqatada iyo beeraleyda ah ku hayeen.
Sidoo kale, Shamo Maxamed Ceel Jooge oo ah gabadh dhiiran ayaa ka qeyb qaadatay howlgallo ay ciidamada dib-u-xoreynta kula wareegeen deegaanno badan oo dhaca galbeedka magaalada Jowhar ee caasimadda Dowlad gobolleedka Hirshabeelle.
Mar ay warbaahinta qaranka la hadahay Shamso waxay sheegtay in iyadoo ganacsato ah ay door biday in cadowga mahadhada ku reebay ka difaacdo nafteeda,maalkeeda iyo waliba walaalaheeda kale ee Soomaaliyeed.
Sidoo kale, Shamso waxay gabdhaha kale ee asaageeda ah ugu baaqday in ay yimaadaan furimaha hore ee cadowga lagula dagaalamayo, halkaas oo ay taalo xaqiiqda dhabta ah ee lagu wajahayo kooxda Khawaarijta ee banneystay dhiiga ummadda musliimta ah ee Soomaaliyeed.
“ Dowladda sharafta leh ee maanta halkan nagu soo salaantay, Wiilasheenna macaawisleyda, ciidamada kale ee dowladda waa mahadsan yihiin, aniga Al-shabaab Aabahey ayay dileen ma garatay, god Allaala iyo godkii ay galaan inaan uga daba gala ayaa jeclahay,wiil iyo gabar kasta oo Soomaaliyeed oo Al-shabaab godob ka gashay ha imaadaan ayaa dhihi lahaa,” ayay tiri geesiyad Shamso Maxamed Ceel Jooge.
Waxay hadalkeeda intaas ku dartay in aysan dib u laabaneyn, islamarkaana argagixisada halkii ay gasho uga daba geli doonto. Khawaarijta ayaa sidoo kale, dhacay hantida qoyska ay Shamso ka soo jeedo sida ay markale sheegtay.
“ Dhibaato badan ayay inoo geysteen, Geel waa naga dhaceen,Aabahey oo maskiin ah oo ganacsanaayo ayay dukaankiisa ku dhex dileen, intaas oo ciidan ayay ku soo weerareen, wax arxan oo ay inoo sameeyeen malahan, Aabahey xittaa marka ay dileen 7-kun oo dollar oo baad ah ayay naga qaadeen, Adeerkey iyo Walaalkey xittaa waa ay dileen, asxaan nooma falin Al-shabaab aan iska reebno,”.
Dhibaatada argagixisada ay u geysato Shacabka Soomaaliyeed waa bad, waxayna hadda dhadhimanayaan qaraarka natiijada ka dhalatay falalka guracan ay Bulshada ku hayeen.
Waxaa hadda ku socdo dagaal xooggan oo u jeedkiisu uu yahay sidii loo ciribtiri lahaa Khawaarijta ee ku dhuumaaleysanaya deegaannada fara ku tiriska ay ku hareen. Ciidamada xoogga dalka ayaa kordhiyay howlgallada lagu naafeynayo argagixisada loogana hortagayo dhibaatada ay shacabka Soomaaliyeed ku hayaan.
