Kusimaha Guddoomiyaha ahna Guddoomiye ku-xigeenka 1aad ee Golaha Wakiilada Koonfur Galbeed Soomaaliya Mudane, Maxamed Nuur Maxamed Macalin oo ay wehliso Guddoomiye ku-xigeenka 2aad ee Golaha Marwo, Shamso Maxamed Yaroow, ayaa maanta Shir guddoomiyay Kalfadhiga 6-aad Kulankiisa 1-aad oo Ajendahiisu ahaa:
1. Aqrinta 1aad Hindise-sharciyeedka Ciidanka Booliska KGS
2. Kalsooni siinta Hanti Dhowraha Guud ee DKGS
3. Ansixinta Hashiiskii Golaha Wadatashiga Qaran(GWQ)
Kulanka Baaralamanka Maanta Waxaa soo xaadirey 48 -Mudane.
Ugu horrayn Hanti Dhowraha cusub Mudane, Maxamed Cumar Axmed oo dhawaan magacaabay Madaxweynaha Dowlad Goboleedka Koonfur Galbeed Soomaaliya, ayaa hor-yimid Golaha, isagoo faahfaahiyay Qorshaha Howleedka Xafiiska Hanti Dhowrka horyaala, intaas kadibna Xildhibaanada Golaha Wakiilada ayaa cod aqlabiyad leh kalsoonida ku siiyay Hanti-dhowraha si uu shaqadiisa u guto.
Waxaana Oggolaatay mudane 48,mana jirin cid ka aamustay cid aan u codeynba.
Intaas kadib, Wasiiru-Dowlaha Wasaaradda Arrimaha Guddaha Dowlad Gobaleedyada koonfur Galbeed howlgalka Abdullahi Mohamed Adan (Farey) ayaa Golaha ka hor Aqriyay Hashiiska Golaha Wadatashiga Qaran(GWQ) ay ku gaareen magaadada Muqdisho 27-Maarso 2023 oo sheegaya Hannanka Doorashooyinka Dalka iyo Midaynta Doorashooyinka Dowlad Goboleedyada, isagoo Xildhibaanada ka codsaday in ay Ansixiyaan oo ay ku raacaan Golaha Wadatashiga Qaran Hashiiska ay ku gaareen Magaalada Muqdisho Maadaama Golaha Wasiirada Dowladda Koonfur Galbeed ay soo ansixiyeen 8-da June 2023.
Kadib Kusimaha Guddoomiyaha ahna Guddoomiye ku-xigeenka 1aad ee Golaha ayaa Cod geliyay Hashiiska, iyadoo xildhibaanada Golaha Wakiilada cod aqlabiyad ku ansixiyay kuna raacay Golaha Wadatashiga Qaran Hashiiska ay gaareen.Waxaana Oggolaatay 48 mudane.
Dhanka kale, Wasiirka kuxigeenka Wasaaradda Amniga DKGS Mudane, Colaad Maxamed Cali, ayaa Golaha ka hor Aqriyay Hindise-sharciyeedka Ciidanka Booliska Koonfur Galbeed Soomaaliya,isagoo aad u faahfaahiyay muhiimada uu sharcigaan u leeyahay Booliska KGS isagoo sheegay in sharcigaan uu sahlayo hagidda, Nidaaminta iyo qaab-dhismeedka Ciidanka Booliska Koonfur Galbeed Soomaaliya.
Ugu dambeyn, Kusimaha Guddoomiyaha ahna Guddoomiye ku-xigeenka 1aad ee Golaha Wakiilada ayaa shirka soo xiray, isagoo sheegay in Guddiga Amniga ee Golaha iyo guud ahaan Xildhibaanada ay waajibkooda ka gutaan Hindise-sharciyeedkan hor yaala.
