Guddoomiyaha Gobolka Banaadir Ahna Duqa Magaalada Muqdisho Mudane Yuusuf Xuseen Jimcaale (Madaale),ayaa xariga ka jaray Warshada sameynta Macmacaanka SOMADO oo ay hirgelinteeda iska kaashadeen Hey’adda Horumarinta Mashaariicda ee TIKA iyo Dowladda Hoose ee Xamar.
Duqa Muqdisho oo munaasabada ka hadlay, ayaa sheegay in Maamulkiisa ay ka go’an tahay sidii fursado shaqo abuur loogu sameyn lahaa dhallinyarada Soomaaliyeed gaar ahaan kuwa ku dhaqan Gobolka Banaadir, isla markaana xirfadooda sare loogu qaadi lahaa. Waxa uuna Hey’adda TIKA kaga mahadceliyay gacanta ay ka geysteen hirgelinta Warshadaan.
Munaasabadan, ayaa waxaa goobjoog ka ahaa Guddoomiye Kuxigeenka Maamulka iyo Maaliyadda Gobolka Banaadir, Madaxda Hey’adda TIKA, Madax ka tirsan Safaaradda Turkiya, Agaasimeyaal, Guddoomiyaha Degmada Shangaani, Siyaasiyiin, Aqoonyahano iyo marti sharaf kale oo ka kala socday Walaalaha Turkiya iyo qeybaha kala gedisan ee Bulshada Gobolka Banaadir.
