Wasaaradda Caafimaadka Dowladda Koonfur Galbeed Soomaaliya, ayaa daah furtay adeeg bixinta mashruuca Damal Caafimaad oo ka fuli doona Gobolada Baay iyo Bakool ee Dowladda Gobaladka Koonfur Galbeed Soomaaliya.
Munaasabada waxaa ka soo qeybgalay isla markaana si wadajir ah u daahfuray Kusimaha Madaxweynaha ahna Gudoomiye ku xigeenka 1aad ee Golaha Wakiilada Dowladda Koonfur Galbeed Soomaaliya mudane Maxamed Nuur Maxamed Macalin iyo Wasiirka Wasaaradda Caafimaadka DKGS Mudane Maxamed Cusmaan Xaaji Cabdi.
Waxaa sidoo kale kasoo qeybgalay qaar ka mid ah La taliyayaash Madaxweynaha, Golaha Wasiirada iyo xildhibaanada DKGS, Agaasimaha Guud ee Madaxtooyada Dowladda Gobaladka Koonfur Galbeed Soomaaliya, Taliyaha Qeybta 60aad ee Ciidamada Xooga iyo Taliyaha sector 3 ee ATMIS, qaar ka mid maamulada degmooyinka iyo gobolada Dowladda Gobaladka Koonfur Galbeed Soomaaliya, Ururada Haweenka iyo Dhalinyarada, Hay’adaha caalamiga ah iyo kuwa gudaha ee ka shaqeeya bixinta adeegyada Caafimaadka, bahda saxaafada iyo fanaaniinta iyo marti sharaf kale.
Mashruucan ayaa loogu talagaley in looga faa’iideeyo bulshada Koonfuur Galbeed si ay u helaan adeeg Caafimaad oo tayo leh oo lacag la’aan ah qeybna ka ah xoojinta adeeg bixinta ku saleysan xirmooyinka Caafimaadka Aas-aasiga ah.
Wasiirka Wasaaradda Caafimaadka mudane Maxamed Cusmaan Xaaji Cabdi oo munaasabada ka hadlay ayaa sheegay in mashruucan ay lee dahay Dowladda Soomaaliya ayna ka wada shaqeynayaan fulinta mashruucan Wasaaradda Caafimaadka Xukuumadda Federaalka Soomaaliya iyo Wasaaradda Caafimaadka Dowladda Gobaladka Koonfur Galbeed Soomaaliya, iyadoo ay taabagelinayso bangiga aduunka sidoo kale bixinta mashruucan ay ku guuleysatay Hay’adda Caalamiga ee ACF.
Wasiirka Caafimaadka Dowladda Gobaladka Koonfur Galbeed Soomaaliya ayaa ku dheeraaday muhiimada mashruucan u lee yahay bulshada iyadoo hore loo qorsheeyay wajiga 1aad in uu ka fulo mashruucan 5 Gobol oo ka mid ah Gobolada Soomaaliya halka Dowladda Koonfur Galbeed ay ku guuleysatay helida 2 Gobol (Bay iyo Bakool) sidoo kalena wajiga 2aad la rajeynayo in Gobolka Shabeelaha Hoose lagu soo daro si loo xoojiyo adeeg bixinta caafimaadka.
