Xafiiska midowga warbaahinta marinka Qaza ayaa goordhaw ku dhawaaqay geerida labo Wariye oo uu ka mid yahay wiil uu dhalay Madaxa Xafiiska Al Jazira Waa’il Al-Daxduux, kadib duqeyn ay Ciidamada Israa’iil ka geysteen magaalada Khan Yoonis ee koonfurta marinka Qaza, taasoo tirada Saxafiyiinta ku geeriyooday duulaan Isra’iil ay ka waddo dhulka Falastiin ka dhigeyso 109 Wariye.
Wariye lagu magacaabo Xamza oo uu dhalay Madaxa Xafiiska Al Jazira ee Marinka Qaza Waa’il Al-Daxduux oo dhawaan qudhiisa ku dhaawacmay duqeeymo halkaas ka dhacay iyo Mustafa Thuraya ayaa goordhaw ku geeriyooday duqeyn ay Israa’iil kula beegsatay Galbeedka magaalada Khan Yoonis ee Koonfurta Marinka Qaza.
Duqeynta ayaa lala beegsaday gaari ay la socdeen Saxafiyiintan oo marayay agagaarka degaanka Al-Mawaasi oo dhanka Koonfur-galbeed kaga beegan Marinka Qaza, xilli ay ku guda jireen howl maalmeedkooda.
Xafiiska midowga warbaahinta Qaza, ayaa ugu baaqay dhamaan ururada saxaafada, kooxaha xuquuqul insaanka iyo hay’adaha sharciga in ay cambaareeyaan fal dambiyeedkan soo noqnoqday, waxa kale oo ay ku baaqeen in cadaadis lagu saaro Isra’iil joojinta dagaalka xasuuqa ah ee lagu hayo dadka rayidka ah ee ku sugan Marinka Qaza.
