Wasaaradda Arrimaha Gudaha, Federaalka iyo Dib u heshiisiinta ayaa xalay xaflad casho ah ku sagootisay Wasiirkii hore, Mudane Danjire Axmed Macallin Fiqi. Wasiir Fiqi ayaa banneeyay xilka Wasaaraddaasi kadib isku-shaandhayn kooban oo Golaha Wasiirrada lagu sameeyay 7-dii bisha April, isaga oo loo magacaabay Wasiirka Arrimaha Dibadda iyo Iskaashiga Caalamiga.
Xafladda cashada ayaa waxaa goob-joog ka ahaa Wasiirka cusub ee Wasaaradda Arrimaha Gudaha, Federaalka iyo Dib u heshiisiinta, Mudane Cali Yuusuf Cali (Xoosh), Wasiiru dowlaha, Wasiir kuxigeenka iyo Agaasimaha Guud ee Wasaaraddaasi.
Muddadii labada sano ee Wasiir Fiqi soo ahaa Wasiirka Arrimaha Gudaha waxa uu kaalin ballaaran ka qaatay horumarinta howlaha Wasaaraddaasi, si gaar ah federaalaynta, dib u heshiisiinta qaran, dowlad dhiska iyo dowlad wanaagga. Hoggaankiisu waxa kale oo uu horumariyay hindiseyaal ay ka mid yihiin qorshaha xasilinta, soo saarista xeerar iyo shuruuc dowladaha hoose iyo doorashooyinka, iyo casriyaynta dukumintiyada iyo faylasha gudaha oo laga dhigay kuwa “degital” ah. Dadaalkiisu waxa uu fududeeyay wada shaqayn uu la yeeshay Wasiirada Arrimaha Gudaha ee Dowladaha xubnaha ka ah Dowladda Faderaalka oo uu gaarsiiyay heer wada-shaqayn oo is-fahan leh.
Wasaaradda ayaa bogaadisay Wasiir Fiqi howlaha uu Qaranka u qabtay, waxa ayna u rajaysay inuu guul uga keeno xilka cusub ee loo igmaday.
